Məhsulların — xüsusilə tərəvəz, meyvə və giləmeyvələrin — dondurularaq saxlanması onların tərkibindəki faydalı maddələrin uzun müddət qorunması üçün ən effektiv üsullardan biri hesab olunur. Foodinfo.az bildirir ki, dietoloq Larisa Nikitina düzgün dondurma prosesi tətbiq edildikdə məhsuldakı vitaminlərin 90 faizinin qorunduğunu açıqlayıb.

Onun sözlərinə görə, ən yüksək nəticə “şok dondurma” adlanan sürətli proses zamanı əldə olunur, çünki məhsul əlavə termik emal görmür. Mütəxəssis bildirir ki, ideal nəticə üçün yalnız bütöv və zədəsiz məhsullar seçilməlidir. Tərəvəzləri dondurmadan əvvəl yumaq, tam qurudmaq və rəngini, strukturunu qorumaq üçün qısa müddətlik blanş etmək tövsiyə olunur.

Giləmeyvələrin isə əvvəlcə bir səthdə ayrı-ayrılıqda dondurulması, daha sonra paketə və ya qutuya yığılması onların bir-birinə yapışmasının qarşısını alır. Nikitina hazırlıq mərhələsinin də vacibliyini xüsusi qeyd edir: paketlərdən havanı tam çıxarmaq, qabları etiketləmək və saxlama müddətlərinə riayət etmək lazımdır. Məsələn, brokoli və gül kələmi təxminən bir il, çiyələk və moruq 10 aya qədər, göyərtilər isə yarım il saxlanıla bilər.

Praktik yanaşma kimi mütəxəssislər hazır qarışıqlardan da istifadəni məsləhət görür: sup və ya yarma yeməkləri üçün tərəvəz qarışıqları, smuzi və desertlər üçün meyvə-giləmeyvə miksleri prosesi xeyli sadələşdirir. Hətta əzilib dondurulmuş giləmeyvələrin buz qəliblərində saxlanması sonradan vitaminlə zəngin çay hazırlamaq üçün ideal variant sayılır. Bununla belə, bəzi məhsullar dondurmaya uyğun deyil — məsələn, xiyar, kahı və turp dondurulduqdan sonra dadını və teksturasını itirir.

Qarpız və qovun əzilmiş kütləyə çevrilir, bütöv sitruslar isə acılıq verir. Bu səbəbdən ekspertlər bu tip məhsullar üçün alternativ üsulları — məsələn, şirə və ya qabıq dondurulmasını — daha məqsədəuyğun hesab edirlər.