Yay aylarında yüksək temperatur qida təhlükəsizliyi üçün ciddi risklər yaradır. Foodinfo.az bildirir ki, Krasnodar vilayətinin İctimai Sağlamlıq və Tibbi Profilaktika Mərkəzinin həkimi və metodisti Marina Dolquşkina bu barədə Krasnodarskie İzvestiya nəşrinə danışıb.

Ekspertin sözlərinə görə, isti hava şəraitində bakteriyalar sürətlə çoxalır və bu da tez xarab olan məhsulların daha qısa müddətdə təhlükəli hala gəlməsinə səbəb olur. Xüsusilə bişmiş yeməklər otaq temperaturunda maksimum iki saat saxlanılmalıdır.

Həkim vurğulayıb ki, məhsulların düzgün temperaturda saxlanması əsas şərtdir. Belə ki, tez xarab olan qidalar soyuducuda +4°C-dən yuxarı olmamaq şərti ilə, balıq və dəniz məhsulları isə +2°C-də saxlanmalıdır.

Marina Dolquşkina həmçinin çarpaz çirklənmə riskinə də diqqət çəkib. Onun sözlərinə görə, çiy və bişmiş qidalar soyuducuda bir-birindən ayrı şəkildə saxlanmalıdır. Bu, qida zəhərlənmələrinin qarşısını almağın vacib şərtlərindən biridir.

Mütəxəssis əlavə edib ki, yeməkdən əvvəl tərəvəz və meyvələr diqqətlə yuyulmalı, göyərtilər isə on faizli duz məhlulunda isladılmalıdır. Bu prosedurlar zərərli mikroorqanizmlərin aradan qaldırılmasına kömək edir.

Yay fəslində xüsusilə qida gigiyenasına ciddi riayət olunmalı, açıq havada saxlanılan və ya düzgün soyudulmayan məhsullardan uzaq durulmalıdır. Dolquşkina hər kəsi bu tövsiyələrə əməl etməyə çağırıb.