Axşam saatlarında qəbul edilən qidalar həm çəkiyə, həm də yuxu keyfiyyətinə birbaşa təsir göstərir.
Foodinfo.az xəbər verir ki, günün son yeməyi yüngül, balanslı və asan həzm olunan olmalıdır.
Bildirilir ki, axşam saatlarında əsas üstünlük zülal və liflə zəngin qidalara verilməlidir. Qaynadılmış və ya sobada bişmiş toyuq, balıq, yumurta və kəsmik kimi məhsullar toxluq hissi yaradır və gecə ərzində orqanizmin bərpa prosesinə dəstək olur.
Tərəvəzlər – xüsusilə xiyar, pomidor, brokoli, kələm və kahı – həm aşağı kalorili, həm də həzmi yormayan seçimlər hesab olunur.
Yüngül tərəvəz və ya mərci şorbası da axşam üçün uyğun variant sayılır. Bundan əlavə, az miqdarda qarabaşaq və ya bulqur kimi kompleks karbohidratlar enerji balansını qorumağa kömək edir.
Qatıq və kefir isə bağırsaq sağlamlığını dəstəkləyərək gecə rahatlığına töhfə verir.
Axşam saatlarında bəzi qidalardan uzaq durmaq tövsiyə edilir. Şirniyyat və şəkərli məhsullar qan şəkərinin sürətli yüksəlməsinə, daha sonra isə kəskin enməsinə səbəb ola bilər. Ağ çörək və xəmir məmulatları artıq kalori ilə yanaşı köp və ağırlıq hissi yarada bilər. Qızardılmış və yağlı yeməklər isə mədə yanması və yuxu pozğunluğuna gətirib çıxara bilər.
Həmçinin qazlı, şəkərli içkilər və çox duzlu qidalar da axşam saatlarında məsləhət görülmür. Bu cür məhsullar səhər ödem və şişkinlik yarada bilər.
Axşam yeməyi yatmazdan ən azı 2–3 saat əvvəl qəbul edilməli, porsiyalar isə nəzarətdə saxlanmalıdır. Gec saatda aclıq hissi yaranarsa, bir stəkan kefir və ya az miqdarda çərəz kifayət edir.
Sağlam və balanslı axşam qidalanması həm rahat yuxunun, həm də ümumi sağlamlığın əsas şərtlərindən biri hesab olunur.
