Yaz fəslinin gəlişi ilə birlikdə bəzi xəstəliklərin yayılma ehtimalı da yüksəlir. Foodinfo.az saytı xəbər verir ki, həkim-qastroenteroloq Yekaterina Kaşux yaz aylarında bağırsaq infeksiyalarının sayında artım müşahidə oluna biləcəyini bildirib.
Foodinfo.az RT saytına istinadla xəbər verir ki, mütəxəssisin sözlərinə görə, bunun əsas səbəblərindən biri hava temperaturunun yüksəlməsi ilə qidaların daha tez xarab olmasıdır. Qışda təhlükəsiz hesab edilən bəzi saxlanma şəraiti yazda artıq riskli ola bilər. Məsələn, əvvəllər açıq havada saxlanılan ərzaqlar istilərin artması ilə tez korlana və sağlamlıq üçün təhlükə yarada bilər.
Həkim qeyd edir ki, yaz aylarında insanların təzə tərəvəz, meyvə və göyərtiyə marağı artır. Lakin bu məhsulların yaxşı yuyulmaması bakteriya və zərərli canlıların orqanizmə daxil olmasına səbəb ola bilər. Xüsusilə yazın ilk göyərtiləri düzgün saxlanmadıqda və ya təmizlənmədikdə infeksiya mənbəyinə çevrilə bilər.
Mütəxəssis əlavə edir ki, havaların isinməsi ilə insanlar daha çox açıq havada qidalanır, küçə yeməklərinə üstünlük verir və istirahətə çıxır. Bu zaman gigiyena qaydalarına tam əməl olunmaması, əllərin yuyulmaması və ya təmiz qabların istifadə edilməməsi infeksiya riskini artırır.
Bundan başqa, bağ evlərində aparılan yaz təmizliyi də müəyyən risk yaradır. Qış boyunca müxtəlif gəmiricilər yaşayış yerlərində iz buraxa bilər və onların ifrazatları ilə çirklənmiş səthlərlə təmas infeksiyaya səbəb ola bilər. Eyni zamanda qarın əriməsi ilə yeraltı suların səviyyəsi yüksəlir və bu, içməli suyun çirklənmə ehtimalını artırır.
Həkim bildirir ki, yazda bəzi insanlar qidalanma rejimini dəyişərək daha yüngül yeməklərə və ya sərt pəhrizlərə keçir. Bu isə həzm sisteminin qoruyucu qabiliyyətini zəiflədərək orqanizmi infeksiyalara qarşı daha həssas edə bilər.
Sonda vurğulanır ki, bağırsaq infeksiyalarının qarşısını almaq üçün sadə qaydalara əməl etmək kifayətdir. Əllərin tez-tez yuyulması, meyvə və tərəvəzlərin yaxşı təmizlənməsi, qidaların düzgün saxlanması və keyfiyyətinə diqqət yetirilməsi sağlamlığın qorunmasında mühüm rol oynayır.
