Uzun və sağlam ömür sürmək istəyən insanların qidalanma vərdişlərinə xüsusi diqqət yetirməsi vacib sayılır. Mütəxəssislər bildirirlər ki, gündəlik rasionda bəzi məhsulların çox istifadə edilməsi ürək və damar sağlamlığı üçün ciddi risk yarada bilər. Foodinfo.az Mirror saytına istinadla xəbər verir ki, dietoloq Mişel Rutenşteyn sağlamlığı qorumaq üçün rasiondan çıxarılması tövsiyə olunan üç məhsulu açıqlayıb.
Mütəxəssisin sözlərinə görə, ilk növbədə emal olunmuş ət məhsullarından uzaq durmaq lazımdır. Xüsusilə səhər yeməyində tez-tez istifadə edilən bekon sağlamlıq üçün arzuolunmaz hesab olunur. Bildirilir ki, bu məhsulun müntəzəm istifadəsi qan təzyiqinin yüksəlməsinə, damar divarlarında iltihabi proseslərin yaranmasına və ürək-damar xəstəlikləri riskinin artmasına səbəb ola bilər.
Dietoloqların diqqət çəkdiyi digər məhsul isə ağ çörəkdir. Bu qida yüksək qlisemik təsirə malik olduğu üçün qanda şəkərin sürətlə artmasına səbəb ola bilər. Bundan başqa, ağ çörək lif və digər faydalı maddələr baxımından tam dənli çörəklərlə müqayisədə daha kasıb sayılır.
Mütəxəssislərin rasiondan çıxarmağı tövsiyə etdiyi üçüncü məhsul isə çipsdir. Bu qida çox vaxt bir neçə dəfə istifadə olunmuş yağda hazırlandığı üçün tərkibində zərərli yağların miqdarı artır. Belə məhsulların tez-tez istifadəsi ürək və damar xəstəliklərinin yaranması riskini yüksəldə bilər.
Həkimlərin sözlərinə görə, qızardılmış qidaların müntəzəm istifadəsi həm artıq çəkinin yaranmasına, həm də qan təzyiqinin artmasına səbəb ola bilər. Bu isə ürək sağlamlığı üçün ciddi təhlükə yaradır.
Mütəxəssislər sağlamlığın qorunması üçün qidalanmada liflə zəngin məhsullara üstünlük verilməsini tövsiyə edirlər. Xüsusilə paxlalı bitkilər həm doyumluluq hissi yaradır, həm də həzm sisteminin fəaliyyətini yaxşılaşdırır.
Bundan əlavə, gündəlik rasionda kifayət qədər meyvə və tərəvəzlərin yer alması vacib sayılır. Həkimlər gün ərzində ən azı beş porsiya tərəvəz və meyvə qəbul etməyi məsləhət görürlər.
Mütəxəssislərin fikrincə, balanslaşdırılmış qidalanma və zərərli məhsullardan uzaq durmaq ürək sağlamlığını qorumağa, ümumi sağlamlıq vəziyyətini yaxşılaşdırmağa və daha uzun ömür sürməyə kömək edə bilər.
