Çay dünyanın ən çox sevilən içkilərindən biridir və bir çox insan üçün gündəlik həyatın ayrılmaz hissəsinə çevrilib. Foodinfo.az xəbər verir ki, terapevt Anastasya Ağaeva qara və yaşıl çayın insan orqanizminə eyni dərəcədə faydalı olduğunu bildirib.

Mütəxəssis qeyd edib ki, hər iki çay növü təbii antioksidantlarla zəngindir və bu maddələr damarların elastikliyini artırır. Bu, qan dövranını yaxşılaşdırır, ürək-damar xəstəlikləri və insult riskini azaldır, həmçinin beyin fəaliyyətinə müsbət təsir göstərir.

Ağaevanın sözlərinə görə, sağlam insanlar gündə üç-dörd fincan çay içə bilər və bu, orqanizm üçün zərərli deyil. Lakin o, çayı şəkərsiz və süni ətirlərsiz içməyi məsləhət görür, çünki bu halda çayın təbii faydası daha çox olur.

Həkim bildirib ki, çay həmçinin diqqəti artırır, beyin fəaliyyətini aktiv saxlayır və orqanizmi yüngül şəkildə canlandırır. Bununla yanaşı, çox miqdarda çay içmək yuxusuzluq və ürək döyüntülərinin artmasına səbəb ola bilər.

Ağaeva onu da vurğulayıb ki, çayı yeməkdən dərhal sonra içmək düzgün deyil. Ən yaxşısı, yeməkdən 20-30 dəqiqə sonra qəbul etməkdir ki, bu da həm həzmi yüngülləşdirir, həm də qidadan faydalı maddələrin mənimsənilməsinə kömək edir.

Mütəxəssis əlavə edib ki, həm qara, həm də yaşıl çayın keyfiyyətinə diqqət etmək vacibdir. Qablaşdırılmamış və təbii yarpaq çayları seçmək, onun faydasını qorumağa kömək edir.

Ağaeva sonda bildirib ki, çayı həyat tərzinin bir hissəsinə çevirmək, amma miqdarda ifrata varmamaq sağlamlıq üçün ən düzgün seçimdir.