Qabaqları dondurmaq həm onların tərkibindəki vitamin və faydalı maddələri qorumağın, həm də uzun müddət saxlamağın ən rahat və səmərəli yollarından biridir. Foodinfo.az xəbər verir ki, bu üsul həm yorucu konservləşdirmədən yayınmağa, həm də tərəvəzin təbii dadını qorumağa imkan verir.
Lakin qabaq suyu çox olan tərəvəz olduğuna görə, düzgün dondurulmadıqda əridikdən sonra lif-lif dağılır və dadını itirir. Bunun qarşısını almaq üçün bəzi sadə, amma vacib qaydalara əməl etmək lazımdır.
Qabaqları necə dondurmaq olar
Düzgün dondurulmuş qabaqlarda vitaminlərin 75–80 faizi və bütün mineral maddələr qalır. Xüsusilə dərhal yığımdan sonra dondurulan qabaqlar qışda mağazalarda satılan, uzun müddət saxlanılmış məhsullardan daha faydalıdır.
Əridildikdən sonra qabağın püreyə çevrilməməsi üçün iki əsas prinsip vacibdir: artıq suyun tam çıxarılması və əvvəlcədən şaxtalandırma.
1. Kub və ya halqa şəklində dondurma (qovurma, yemək və bişirmə üçün)
Qabaqları 1–1,5 santimetr ölçüdə kub və ya halqa formasında doğrayın. Doğranmış hissələri 1–2 dəqiqə qaynar suda saxlayın (bu, rəngin və quruluşun qorunmasına kömək edir), sonra dərhal 3 dəqiqəlik buzlu suda soyudun.
Sonra parçaları təmiz dəsmalın üzərinə düzərək tam qurudun. Qurumuş hissələri perqament kağızı sərilmiş siniyə bir qatla düzün və 2–3 saat dondurucuda saxlayın. Donduqdan sonra onları hava keçirməyən torbalara və ya qablara yığmaq olar.
2. Rəndələnmiş halda dondurma (qabaq kökəsi və ya zapekanka üçün)
Qabaqları iri gözlü sürtgəcdən keçirin, bir az duzlayın və 15 dəqiqə gözləyin. Sonra tənzif və ya süzgəcdən istifadə edərək suyunu tam sıxın. Quru kütləni paylara bölüb yastı formada torbalara yığın. Bu həm yerə qənaət edəcək, həm də ərimə prosesini sürətləndirəcək.
3. Püre şəklində dondurma (uşaq qidası və souslar üçün)
Qabaqların qabığını soyun, içini təmizləyin və 10–15 dəqiqə bişirin və ya buxarda yumşaldın. Duz əlavə etməyin. Yumşalmış qabaqları blenderlə püre halına salın, soyudun və buz qablarına və ya silikon formalara tökün. Donduqdan sonra kub və ya dairəvi hissələri hava keçirməyən qabda saxlaya bilərsiniz.
Dondurulmuş qabaqlardan necə istifadə etməli
– Kub və halqa şəklində doğranmış qabaqları əritmədən birbaşa isti yeməyə və ya tavaya əlavə edin.
– Rəndələnmiş qabaqları soyuducuda əridib yenidən suyunu sıxmaq lazımdır.
– Püre halındakı qabaqları isə birbaşa isti yeməyə əlavə etmək və ya əvvəlcədən otaq temperaturunda əridərək istifadə etmək olar.
