Son illər bitki əsaslı qidalanmaya maraq artsa da, “vegan” və “vegetarian” anlayışları tez-tez qarışdırılır.
Foodinfo.az xəbər verir ki, bu iki qidalanma forması arasında həm qida seçimi, həm də həyat tərzi baxımından mühüm fərqlər var.
1. Vegetarian qidalanma
Vegetarianlar ət və balıq məhsullarını istehlak etmirlər. Lakin bir çox vegetarian növündə heyvan mənşəli digər məhsullara icazə verilir. Məsələn, lakto-vegetarianlar süd və süd məhsulları, ovo-vegetarianlar isə yumurta istehlak edir. Lakto-ovo vegetarianlar həm süd məhsullarını, həm də yumurtanı qida rasionuna daxil edirlər.
2. Vegan qidalanma
Veganlar isə heyvan mənşəli heç bir məhsuldan istifadə etmirlər. Bu təkcə qida ilə məhdudlaşmır. Vegan qidalanmada ət, balıq, süd, yumurta, bal və jelatin kimi məhsullar tamamilə qadağandır. Bundan əlavə, veganlar geyim və gündəlik həyatda da dəri, yun, ipək kimi heyvan mənşəli məhsullardan imtina edirlər.
Vegetarianlıq əsasən qidalanma seçimi kimi qəbul edilir, veganlıq isə daha geniş anlayışdır və etik, ekoloji və sağlamlıq səbəblərinə əsaslanan həyat tərzi sayılır.
Qısa desək, vegetarianlar bəzi heyvan mənşəli məhsulları qəbul edə bildiyi halda, veganlar heyvan mənşəli hər cür məhsuldan tamamilə uzaq dururlar. Hər iki qidalanma növünün düzgün planlandıqda sağlam ola biləcəyi vurğulanır, lakin mütəxəssislər belə pəhrizlərə keçməzdən əvvəl balanslı rasionun vacibliyini qeyd edirlər.
