Mədə yanması əsasən düzgün olmayan qidalanma nəticəsində yaranır və bir çox insan bu problemi ciddi qəbul etmir. Yağlı, acı və turş qidalar mədədə turşuluğun artmasına səbəb olaraq narahatlıq yarada bilər. Foodinfo.az Doctorpiter-ə istinadla xəbər verir ki, mütəxəssislər mədə yanmasının sadə diskomfort deyil, həzm sistemi ilə bağlı siqnal olduğunu bildirirlər. Bu hal xüsusilə həssas mədəsi olan insanlarda daha tez-tez müşahidə olunur. Nəzarətsiz şəkildə dərman qəbul etmək isə problemi gizlətsə də, kökündən həll etmir.

Həkimlərin sözlərinə görə, mədə ilə qida borusunu birləşdirən əzələ düzgün işləmədikdə mədə möhtəviyyatı geri qayıdır və yanma hissi yaranır. Bu vəziyyət çox zaman qidalanma vərdişləri ilə bağlı olur. Xüsusilə yağlı yeməklər, acı xörəklər və turş məhsullar mədəni qıcıqlandıraraq turşu ifrazını artırır. Nəticədə sinə nahiyəsində və boğazda yanma hissi meydana çıxır.

Mütəxəssislər bildirir ki, souslu yeməklər, manqal məhsulları, qızardılmış kartof və ədviyyatlı xörəklər mədə yanmasını gücləndirə bilər. Mayonezli salatlar və ağır marinadlar da eyni təsirə malikdir. Sitrus meyvələri, pomidor və pomidor tərkibli yeməklər, qazlı içkilər, sarımsaq və soğan mədənin turşuluğunu artıran qidalar sırasında yer alır. Bu səbəbdən mədə yanmasından əziyyət çəkən şəxslərə daha yüngül və balanslı qidalanma tövsiyə olunur.