Çiyələyə qarşı allergik reaksiya hər yaşda baş verə bilər, lakin bu vəziyyət daha çox uşaqlar və yeniyetmələr arasında yayılmışdır. Foodinfo.az bildirir ki, bu barədə Gemotest laboratoriyasının eksperti, qastroenteroloq Yekaterina Kaşux RT-yə açıqlama verib.

Onun sözlərinə görə, çiyələyə allergiyası ola biləcək şəxslər əsasən bir neçə risk qrupuna aiddir. Bunlara qoz-fındıq və sitrus meyvələrinə qarşı allergiyası olanlar, ot poleninə həssaslığı (pollinoz), astması və atopik dermatiti olan şəxslər daxildir. İrsi faktor da mühüm rol oynayır – ailəsində allergik xəstəliklər olan şəxslərdə bu risk daha yüksək olur.

Kaşux qeyd edib ki, çiyələk allergiyasının simptomları müxtəlifdir: dəri səpgiləri və qaşınma, dodaq və dilin şişməsi, burun axması, asqırma, öskürək, nəfəs darlığı, qarın ağrısı və ishal halları müşahidə oluna bilər. Daha ağır hallarda başgicəllənmə, zəiflik və anafilaktik şok kimi həyati təhlükə yaradan reaksiyalar baş verə bilər ki, bu zaman dərhal təcili tibbi yardım çağırmaq vacibdir.

Həkim əlavə edib ki, allergiyası olmayan insanlar üçün çiyələk istehlakına elmi cəhətdən heç bir məhdudiyyət yoxdur. Onlar əsasən fərdi toxluq hissinə və pəhrizin balansına diqqət yetirməlidirlər.

Uşaqlar üçün də eyni qaydalar keçərlidir: əgər heç bir allergik reaksiya müşahidə olunmursa, çiyələk təhlükəsiz şəkildə onların rasionuna daxil edilə bilər. Kaşux bildirib ki, bu giləmeyvəni qatıq və kefirlə birləşdirmək, smoothies və ya təbii desertlər şəklində təqdim etmək mümkündür.