Bitki mənşəli südün sağlamlıq baxımından faydası onun tərkibindən birbaşa asılıdır.
Foodinfo.az bildirir ki, dietoloq Natalya Mizinova bu növ içkilərin yalnız əsas bitki və sudan ibarət olduqda orqanizm üçün yararlı ola biləcəyini deyib.

Mütəxəssis misal olaraq badam südünü göstərib. Onun sözlərinə görə, əgər badam sadəcə üyüdülüb su ilə qarışdırılaraq təbii şəkildə hazırlanırsa, bu məhsul orqanizmə faydalı təsir göstərə bilər. Lakin sənaye üsulu ilə istehsal olunan bir çox bitki mənşəli südlərə müxtəlif qatqı maddələri, konservantlar, şəkər və dadvericilər əlavə edilir.

Mizinova xəbərdarlıq edib ki, bu cür əlavələr içkinin təbii keyfiyyətini azaldır, bəzi hallarda isə həzm sisteminə mənfi təsir göstərir. Onun fikrincə, istehlakçılar məhsul seçərkən qablaşdırmadakı tərkib hissələrinə diqqətlə baxmalı və “yalnız iki komponent – su və bitki əsası” olan variantlara üstünlük verməlidirlər.

Dietoloq əlavə edib ki, təbii tərkibli bitki südü heyvan mənşəli südə alternativ ola bilər, xüsusən də laktaza çatışmazlığı olan və ya vegan pəhrizinə üstünlük verən şəxslər üçün. O, süni əlavələrin uzunmüddətli istifadəsinin metabolizmi poza biləcəyini və qida balansını zədələyə biləcəyini də vurğulayıb.