Qaynadılmış toyuq sağlam və yüngül yemək növü olsa da, onun saxlanma qaydalarına əməl edilməzsə, bakteriyalar sürətlə çoxalaraq qida zəhərlənməsinə səbəb ola bilər.

Foodinfo.az qaynadılmış toyuğun təhlükəsiz şəkildə necə saxlanılmalı olduğunu izah edir.

1. Soyuma müddəti vacibdir

Toyuğu bişirdikdən sonra dərhal soyuducuya qoymaq olmaz. Əvvəlcə otaq temperaturunda ən çox 1 saat soyuması gözlənilməlidir. Daha uzun müddət otaq şəraitində qalması bakteriyaların (xüsusilə Salmonella və E. coli) yaranmasına səbəb ola bilər.

2. Hava keçirməyən qabda saxlayın

Soyumuş toyuğu hava keçirməyən qabda və ya sıx bağlanan qapaqlı qida konteynerində saxlamaq lazımdır. Bu, həm bakteriyalardan qoruyur, həm də qoxunun soyuducuda digər məhsullara keçməsinin qarşısını alır.

3. Soyuducuda saxlanma müddəti

Qaynadılmış toyuq soyuducuda 3–4 gün ərzində təhlükəsiz qala bilər. Bu müddətdən sonra istehlak etmək məsləhət görülmür, çünki keyfiyyət və dad itir, mikroorqanizmlər çoxala bilər.

4. Dondurucuda daha uzun müddət saxlamaq olar

Əgər toyuğu uzun müddət saxlamaq istəyirsinizsə, dondurmaq ən doğru seçimdir. Qaynadılmış toyuq -18°C temperaturda 2–3 aya qədər təhlükəsiz qalır. Yenidən istifadə etməzdən əvvəl tam şəkildə əridilməlidir.

5. Yenidən qızdırarkən diqqətli olun

Toyuğu qızdırmadan əvvəl otaq temperaturunda çox saxlamaq olmaz. Mikrodalğalı sobada və ya tavada bərabər şəkildə isinməsi vacibdir — daxili hissənin də tam isti olması bakteriyaların ölməsini təmin edir.

Mütəxəssislər bildirirlər ki, qaynadılmış toyuğu saxlarkən təmiz qab, uyğun temperatur və vaxt rejimi əsas qaydalardır. Əks halda, qida zəhərlənməsi və mədə-bağırsaq pozğunluqları qaçılmaz ola bilər.