Zərdəçal uzun illərdir həm mətbəxdə, həm də sağlamlıq məqsədilə istifadə olunan məşhur ədviyyələrdən biri hesab olunur. Bu bitki özünəməxsus sarı rəngi və bir qədər acı dadı ilə seçilir və müxtəlif yeməklərə əlavə edilir. Foodinfo.az 1001sovet saytına istinadla xəbər verir ki, zərdəçalın çoxsaylı faydalarına baxmayaraq, bəzi hallarda onun istifadəsi sağlamlıq üçün risk yarada bilər. Mütəxəssislər bildirirlər ki, bu ədviyyənin gündəlik qəbul miqdarı 3 qramdan artıq olmamalıdır, əks halda mənfi təsirlər ortaya çıxa bilər. Araşdırmalar göstərir ki, zərdəçal iltihabəleyhinə, mikrobəleyhinə və güclü antioksidant xüsusiyyətlərə malikdir.
Bu bitki immun sistemini gücləndirməyə, orqanizmin müdafiə qabiliyyətini artırmağa və xəstəliklərdən sonra bərpa prosesini sürətləndirməyə kömək edir. Eyni zamanda qaraciyərin fəaliyyətinə müsbət təsir göstərir və ürək-damar xəstəlikləri riskini azaltmağa dəstək verir. Zərdəçalın müntəzəm istifadəsi oynaq ağrılarını yüngülləşdirə və zehni fəaliyyəti stimullaşdıra bilər. Bununla belə, hər kəs üçün bu ədviyyə təhlükəsiz hesab edilmir və bəzi insanlar onun istifadəsindən çəkinməlidir. Xüsusilə allergiyaya meyilli şəxslər, hamilə və süd verən qadınlar, eləcə də altı yaşdan kiçik uşaqlar üçün zərdəçal tövsiyə edilmir.
Bundan əlavə, insult keçirmiş şəxslər, öd yolları xəstəlikləri olanlar və yüksək qan təzyiqindən əziyyət çəkənlər üçün də zərdəçalın istifadəsi riskli ola bilər. Kəskin mədə-bağırsaq xəstəlikləri, qastrit və xora hallarında bu ədviyyə vəziyyəti daha da ağırlaşdıra bilər. Böyrək və ya mədəaltı vəzinin iltihabi xəstəlikləri zamanı da ehtiyatlı olmaq lazımdır. Həmçinin hepatit, damar xəstəlikləri və qlaukoma kimi problemləri olan şəxslər üçün də zərdəçal məsləhət görülmür. Qan durulaşdırıcı və şəkərli diabetə qarşı dərman qəbul edən şəxslər də bu ədviyyədən istifadə etməzdən əvvəl həkimlə məsləhətləşməlidir.
Mütəxəssislər əlavə olaraq xəbərdarlıq edirlər ki, bazarda satılan bəzi zərdəçal məhsulları keyfiyyətsiz ola bilər. Bəzi hallarda istehsalçılar məhsulun rəngini daha cəlbedici etmək üçün zərərli maddələr əlavə edə bilirlər. Aparılan araşdırmalarda bəzi nümunələrdə ağır metal hesab edilən qurğuşun tərkibli birləşmələrə rast gəlinib. Bu cür maddələr insan sağlamlığı üçün təhlükəli hesab olunur və xüsusilə uşaqlarda ciddi fəsadlara səbəb ola bilər. Buna görə də mütəxəssislər yalnız etibarlı və keyfiyyətli məhsulların seçilməsini tövsiyə edirlər
