Son dövrlərdə sosial şəbəkələrdə sürətli arıqlama vəd edən müxtəlif əlavələr geniş yayılıb. Xlorofil, maqnezium sitratı və inozitol kimi maddələrin qısa müddətdə çəki azaltdığı iddia olunur. Lakin mütəxəssislər bu yanaşmanın elmi əsasının olmadığını bildirirlər. Foodinfo.az Life.ru saytına istinadla xəbər verir ki, diyetoloq Olqa Çuntonova bu cür “trend” əlavələrin əslində yalnız yanlış təsəvvür yaratdığını qeyd edib. Onun sözlərinə görə, bu vasitələr real yağ azalmasına səbəb olmur.

Mütəxəssis izah edir ki, sadalanan maddələrin hər birinin orqanizmdə müəyyən rolu olsa da, onların heç biri birbaşa yağ yandırmır. Məsələn, maqnezium sinir sisteminin tənzimlənməsində iştirak edir və stressi azalda bilər. İnozitol insulin həssaslığına təsir göstərir. Xlorofil isə əsasən marketinq məhsulu kimi təqdim olunur və arıqlama baxımından effektivliyi sübut edilməyib. Ən vacib məqam isə odur ki, bu maddələr enerji çatışmazlığı yaratmır və bu olmadan çəki azaltmaq mümkün deyil.

Diyetoloq vurğulayır ki, sosial şəbəkələrdə göstərilən sürətli nəticələr əksər hallarda yağ itkisi ilə bağlı olmur. Bu prosesdə daha çox orqanizmdə suyun azalması, qlikogen ehtiyatlarının tükənməsi və bağırsağın boşalması rol oynayır. Nəticədə əldə edilən çəki itkisi müvəqqəti olur və qısa müddətdə geri qayıdır.

Bundan əlavə, bu cür yanaşmalar arıqlamanın əsas faktorlarını nəzərə almır. Hormonal balans, qidalanma davranışı, yuxu keyfiyyəti və stress səviyyəsi kimi mühüm amillər diqqətdən kənarda qalır. Halbuki uzunmüddətli və sağlam nəticə əldə etmək üçün məhz bu göstəricilərin tənzimlənməsi vacibdir.

Mütəxəssislər qeyd edir ki, “tez və asan arıqlama” ideyası insanlarda real olmayan gözləntilər yaradır. Bu isə tez-tez uğursuz cəhdlərə və çəkinin geri qayıtmasına səbəb olur. Nəticədə orqanizm yeni şəraitə uyğunlaşır və çəki azaltmaq daha da çətinləşir. Sağlam və davamlı arıqlama üçün balanslı qidalanma və həyat tərzi dəyişiklikləri əsas rol oynayır.