Payızın ən sevilən tərəvəzlərindən olan balqabaq təkcə dadlı deyil, həm də sağlamlıq üçün çox faydalıdır. Foodinfo.az xəbər verir ki, dietoloq Conatan Pörtell URA.RU-ya açıqlamasında balqabağın orqanizmə təsir edən səkkiz əsas faydasını sadalayıb və onun gündəlik menyuda yer almasının vacibliyini vurğulayıb.
Mütəxəssisin sözlərinə görə, balqabaq ilk növbədə göz sağlamlığını qoruyur. Tərkibindəki beta-karotin orqanizmdə A vitamininə çevrilərək hüceyrələri qoruyur və yaşla bağlı görmə problemlərinin, o cümlədən kataraktanın qarşısını alır.
İkinci mühüm fayda immunitetin güclənməsidir. A, C və E vitaminlərinin birgə təsiri bağırsaqları qoruyur və infeksiyalara qarşı mübarizəni asanlaşdırır, yüksək lif miqdarı isə sağlam mikrofloranı dəstəkləyir.
Balqabaq həm də ürək üçün çox faydalıdır. Onun tərkibindəki kalium, kalsium və maqnezium təzyiqi normada saxlamağa kömək edir və ürək-damar xəstəlikləri riskini azaldır.
Dördüncü səbəb həzm sisteminə dəstəkdir. Balqabaqdakı liflər bağırsaqların müntəzəm işləməsini təmin edir və faydalı bakteriyaların balansını qoruyur.
Beşinci fayda çəkiyə nəzarət ilə bağlıdır. Balqabaq həm az kalorilidir, həm də tərkibində çoxlu su və lif var, bu da toxluq hissini uzun müddət saxlayır və artıq yeməyin qarşısını alır.
Altıncı səbəb dərinin sağlamlığıdır. A, C və E vitaminləri dərini günəşin zərərli təsirindən qoruyur, onun strukturunu yaxşılaşdırır və gənc görünməsinə kömək edir.
Yeddinci üstünlük xərçəng riskinin azaldılmasıdır. Tədqiqatlar göstərir ki, beta-karotin kimi antioksidantlar bəzi onkoloji xəstəliklərin yaranma ehtimalını azalda bilər.
Səkkizinci fayda isə qan şəkərinin tənzimlənməsidir. Balqabaq və onun tumları qlükoza səviyyəsini sabit saxlamağa kömək edir ki, bu da diabeti olan və ya ona meyilli insanlar üçün xüsusilə vacibdir.
Pörtell həmçinin xəbərdarlıq edib ki, bəzi insanlar – xüsusən də qida allergiyası və ya həzm sistemi həssas olanlar – balqabaq istehlakında ehtiyatlı olmalıdırlar.
Dietoloqun sözlərinə görə, balqabağın müntəzəm qəbulu orqanizmin müdafiə gücünü artırır, enerjini yüksəldir və bir çox xəstəliklərdən qorunmağa kömək edir.
