Nektarin son illərdə sağlam qidalanma tərəfdarlarının ən çox seçdiyi meyvələrdən birinə çevrilib və bu heç də təsadüfi deyil. Foodinfo.az BB.LV saytına istinadla xəbər verir ki, bu meyvə əslində tüksüz şaftalı növü olub, həm dadı, həm də qida dəyəri ilə diqqət çəkir. Onun vətəni qədimdən Çinə bağlıdır və bu ölkədə nektarin “uzunömürlülük qidası” kimi tanınır.
Mütəxəssislərin sözlərinə görə, nektarin tərkibində orqanizm üçün vacib olan çoxsaylı minerallar və vitaminlər daşıyır. Endokrinoloq-diyetoloq Alla Fedorçenkonun fikrincə, bu meyvə xüsusilə kalium, fosfor, dəmir və C vitamini ilə zəngindir və şaftalı ilə müqayisədə daha çox provitamin A ehtiva edir. Bu maddələr hüceyrələrin bərpasına kömək edir, ürək-damar sistemini qoruyur və sinir sisteminin normal fəaliyyətini dəstəkləyir. Eyni zamanda, nektarin tərkibində olan liflər xolesterinin səviyyəsini azaltmağa və həzmi yaxşılaşdırmağa kömək edir.
Araşdırmalar göstərir ki, nektarin müntəzəm istifadə edildikdə yüksək qan təzyiqi və ateroskleroz riskini azalda bilər, həmçinin görmə qabiliyyətinin qorunmasına müsbət təsir göstərir. Onun tərkibindəki xüsusi maddələr dərinin elastikliyini saxlayır, qocalma prosesini ləngidir və zərərli mikroorqanizmlərlə mübarizəyə kömək edir. Bundan əlavə, aşağı kalorili olması (100 qramda cəmi 48 kkal) onu arıqlamaq istəyənlər üçün də ideal seçimə çevirir.
Həkimlər nektarinin ən faydalı şəkildə təzə halda qəbul edilməsini tövsiyə edir. Sağlam insanlar gün ərzində 3-4 ədəd meyvə yeyə bilər və bunu yeməkdən bir qədər əvvəl və ya sonra etmək daha məqsədəuyğundur. Bununla yanaşı, diabet xəstələri üçün gündəlik norma bir ədəd ilə məhdudlaşdırılmalıdır və qan şəkərinə nəzarət vacibdir.
Bununla belə, bəzi hallarda ehtiyatlı olmaq lazımdır. Allergiyası olan şəxslər, eləcə də öd kisəsi və mədə-bağırsaq xəstəliklərinin kəskin mərhələsində olanlar bu meyvədən uzaq durmalıdır. Lakin xəstəliklər səngidikdən sonra nektarinin rasiona qaytarılması mümkündür.
Təbiətin maraqlı “sürprizi” sayılan nektarin şaftalının təsadüfi mutasiyası nəticəsində yaranıb. Bu gün isə o, həm dadı, həm də sağlamlığa verdiyi töhfə ilə gündəlik qidalanmada xüsusi yer tutur.
