A vitamininin orqanizmin normal fəaliyyəti üçün vacib vitaminlərdən biri olduğunu bildirirlər. Bu vitamin göz sağlamlığının qorunması, immun sisteminin gücləndirilməsi və dəri sağlamlığının dəstəklənməsində mühüm rol oynayır.
Foodinfo.az xəbər verir ki, A vitamini həm heyvani, həm də bitki mənşəli qidalarda olur. Ən zəngin mənbələr sırasında qaraciyər, yumurta sarısı, süd və süd məhsulları göstərilir.
Bitki mənşəli qidalar arasında isə kök, balqabaq, şirin kartof, ispanaq və brokoli xüsusilə seçilir. Bu qidaların tərkibində olan beta-karotin orqanizmdə A vitamininə çevrilir.
Ərik, manqo, papaya və qovun kimi narıncı və qırmızı rəngli meyvələrin də A vitamini baxımından faydalı olduğu qeyd edilir.
A vitamini çatışmazlığı görmə zəifliyi, immun sisteminin zəifləməsi və dəri problemlərinə səbəb ola bilər. Bununla yanaşı, vitaminin həddindən artıq qəbulunun da sağlamlıq üçün risk yaratdığı vurğulanır.
Gündəlik rasionda balanslı və müxtəlif qidalara yer vermək tövsiyə edilir.
