İnsanların gündəlik rasionunda tez-tez rast gəlinən kolbasa, sosis və digər emal olunmuş ət məhsulları sağlamlıq üçün ciddi risklər daşıyır. Foodinfo.az xəbər verir ki, Rusiya Qidalanma, Biotexnologiya və Qida Təhlükəsizliyi Federal Tədqiqat Mərkəzinin Kliniki Qidalanma Klinikası nəzdində gündüz stasionarının müdiri, kardioloq və dietoloq Tatyana Zalotova “kp.ru”ya açıqlamasında belə məhsulların damar sisteminə mənfi təsirlərini açıqlayıb.

Onun sözlərinə görə, emal olunmuş ətlərin tərkibində çoxlu miqdarda zərərli yağlar, yüksək miqdarda duz və damarlara birbaşa zərər vuran nitratlar mövcuddur. Bu səbəbdən belə məhsulların müntəzəm qəbulu həm qan təzyiqinin yüksəlməsinə, həm də damar divarlarının zəifləməsinə gətirib çıxarır.

Zalotova bildirib ki, emal olunmuş ət məhsullarından hazırlanan sadə bir sendviç belə orqanizmdə mənfi proseslər yarada bilər: “Belə qidalar qan şəkərini artırır, nəticədə qanda artıq qlükoza zülallarla birləşərək damar divarlarını ‘karamelizə edir’. Bu isə onları sərtləşdirir və zədələnməyə daha həssas edir”.

Mütəxəssis əlavə edib ki, bu cür qidalar təkcə damarlara deyil, qaraciyərə də mənfi təsir göstərir. Çünki emal olunmuş ətlərin tərkibindəki konservantlar və kimyəvi qatqılar qaraciyərin təmizləmə funksiyasını zəiflədir.

O, ürək-damar sağlamlığını qorumaq üçün belə məhsulların istifadəsini minimuma endirməyi, rasionu daha çox təbii protein mənbələri ilə zənginləşdirməyi məsləhət görüb: “Toyuq, hinduşka, təzə balıq və paxlalılar həm damarlara yüngül təsir edir, həm də zəruri qida maddələrini təmin edir”.

Zalotovanın sözlərinə görə, düzgün qidalanmada əsas məqsəd orqanizm üçün sadə və təbii mənbələrdən faydalanmaq olmalıdır. Belə olduqda, damarların elastikliyi qorunur, ürək yükdən azad olur və uzunmüddətli sağlamlıq təmin olunur.