Gündəlik qidalanma dəri sağlamlığına birbaşa təsir göstərir. Xüsusilə bəzi qidaların həddindən artıq istehlakı sızanaq və dəri problemlərinin yaranmasına səbəb ola bilər.

Foodinfo.az xəbər verir ki, şəkərli qidalar və qazlı içkilər qan şəkərinin sürətlə yüksəlməsinə səbəb olur. Bu isə hormon balansına təsir edərək dəridə yağ ifrazını artırır. Nəticədə sızanaq problemi daha da güclənir.

Fast-food məhsulları və yağlı qidalar da risk yaradan amillər arasında göstərilir. Çox yağlı və işlənmiş qidalar orqanizmdə iltihab proseslərini artıraraq dəri sağlamlığına mənfi təsir göstərir.

Bəzi araşdırmalarda həddindən artıq süd məhsulu istehlakının da sızanaqları artırdığı vurğulanır. Xüsusilə hormon tərkibli qidaların bəzi insanlarda dəri problemlərini gücləndirə biləcəyi bildirilir.

Ağ undan hazırlanmış çörək, bulkalar və digər rafinə edilmiş məhsulların tez-tez istifadəsi də sızanaq riskini artırır. Bu məhsullar qan şəkərində ani dəyişikliklər yaratdığı üçün dəriyə təsir göstərir.

Dermatoloqlar sağlam və parlaq dəri üçün balanslı qidalanma, bol su qəbulu, kifayət qədər yuxu və meyvə-tərəvəz istehlakının vacibliyini vurğulayırlar. Davamlı və güclü sızanaq problemi olduqda isə mütəxəssis məsləhəti almaq tövsiyə edilir.