Səhər saatlarında qəbul edilən bəzi məşhur içkilər düşündüyündən daha ciddi həzm problemlərinə səbəb ola bilər. Xüsusilə acqarına içilən turşulu və kofeinli məhsullar mədə selikli qişasını qıcıqlandırır və zamanla narahatlıq yaradır.

Foodinfo.az “EatingWell” nəşrinə istinadla xəbər verir ki, amerikalı qastroenteroloq Michael Russo səhərlər acqarına qəhvə, enerji içkisi və sitrus şirələrinin qəbulunun bəzi insanlar üçün təhlükəli ola biləcəyini bildirib.

Mütəxəssisin sözlərinə görə, xüsusilə qastrit və reflüks problemi yaşayan şəxslərdə belə vərdişlər yanma, köp və ürəkbulanma hissini gücləndirir. O qeyd edib ki, bir çox insan səhər enerji almaq məqsədilə qəhvəyə üstünlük verir, lakin boş mədədə qəbul edilən kofein kortizol hormonunun səviyyəsini artıraraq stress reaksiyasını gücləndirə bilər.

Həkim hesab edir ki, səhər saatlarında ilıq su, yulaf əsaslı içkilər və ya şəkərsiz bitki çayları daha təhlükəsiz seçimdir. Eyni zamanda o vurğulayıb ki, səhər yeməyi qəbul edilmədən əvvəl yüksək turşulu meyvə şirələrinin içilməsi bağırsaq fəaliyyətinə də mənfi təsir göstərə bilər.

Araşdırmalara görə, uzun müddət düzgün olmayan səhər qidalanması həzm sistemində xroniki problemlərin yaranma riskini artırır. Mütəxəssis sağlam səhər rejiminin ümumi enerji səviyyəsinə və immun sisteminə birbaşa təsir etdiyini də əlavə edib.