C vitamini güclü antioksidantdır, immun sistemini möhkəmləndirir, ürək-damar sağlamlığını qoruyur və orqanizmdə qocalma prosesini ləngidir. Bu vitaminin çatışmazlığının qarşısını almaq üçün gündəlik qidalanmanı düzgün qurmaq vacibdir. Maraqlıdır ki, C vitamini ilə zəngin məhsullar siyahısında portağal yer almır.

Foodinfo.az BB.LV saytına istinadla xəbər verir ki, C vitamini orqanizmdə kollagen sintezində əsas rol oynayır. Məhz kollagen dəri, damarlar və sümüklərin sağlamlığını qoruyan əsas struktur zülaldır. Bu vitamin toxumaların bərpasını sürətləndirir, ateroskleroz riskini azaldır, immuniteti gücləndirir və iş qabiliyyətini artırır. Bundan əlavə, C vitamini viruslara qarşı immun müdafiənin əsas elementlərindən biridir.

Endokrinoloq Dilyara Lebedeva bildirir ki, C vitamini çatışmazlığını analizlə müəyyən etmək çətindir, lakin bəzi əlamətlər bu problemdən xəbər verə bilər. Onun sözlərinə görə, ilk növbədə diş ətlərinin qanaması diqqət çəkir. Digər əlamətlərə dişlərin laxlaması, səbəbsiz göyərmələr, yaraların gec sağalması və tez-tez soyuqdəymə, kəskin respirator virus infeksiyaları daxildir.

C vitamini ən çox hansı məhsullarda var?

Mütəxəssisin sözlərinə görə, C vitamini ilə ən zəngin məhsullar bunlardır:

  • Qurudulmuş itburnu – 100 qramda 1200 mq

  • Təzə itburnu – 100 qramda 470 mq

  • Qırmızı şirin bibər – 100 qramda 250 mq

  • Qara qarağat – 100 qramda 200 mq

  • Çaytikanı – 100 qramda 200 mq

  • Təzə cəfəri – 100 qramda 150 mq

Endokrinoloq xəbərdarlıq edir ki, apteklərdə satılan askorbin turşusu və C vitamini preparatları əsasən bioloji əlavələrdir və həkim məsləhəti olmadan qəbul edilməməlidir. Əgər qablaşdırmada vitaminin mənbəyi və forması göstərilməyibsə, bu məhsul keyfiyyətsiz ola bilər.

Qeyd edək ki, şüyüd, kələm növləri (Brüssel, ağbaş, gül kələmi), kartof, pomidor, alma, ananas və sitrus meyvələri də C vitamini ilə zəngindir.

Bişirmə zamanı C vitaminini necə qorumaq olar?

Mütəxəssislər faydalı maddələrin itməməsi üçün aşağıdakı tövsiyələri verirlər:

  1. Yeməyi bişirərkən qabın ağzını qapalı saxlayın – oksigenlə təmas vitamini daha tez parçalayır.

  2. Məhsulları artıq qaynayan suya əlavə edin.

  3. Bişirmə zamanı bir az sirkə qatmaq olar – turş mühitdə C vitamini daha yaxşı qorunur.

  4. Dəmir və mis qab-qacaqdan istifadə etməyin, çünki metal səthlər vitaminin parçalanmasını sürətləndirir.

C vitamini