Səhər saatlarında qəhvə tez ayıltmaq təsiri göstərsə də, bəzən bu hal qısa müddət sonra yorğunluq, əsəbilik və yenidən qəhvə içmək istəyi ilə əvəz olunur. Məhz buna görə son dövrlər bir çox insan səhər qəhvəsinə daha yumşaq təsir edən alternativlər axtarır. Foodinfo.az Sports.kz saytına istinadla xəbər verir ki, bu baxımdan ən çox tövsiyə olunan içkilərdən biri kərəvizdən hazırlanan smuzidir.

Mütəxəssislərin fikrincə, kərəvizli smuzi orqanizmi sakit şəkildə oyadır, sinir sisteminə əlavə yük salmır və günə düzgün su balansı ilə başlamağa kömək edir. Kərəvizin tərkibi əsasən sudan ibarət olsa da, eyni zamanda kalium, maqnezium, C vitamini və liflə zəngindir. Bu maddələr həzmi hərəkətə gətirir, bədəndə yığılan artıq mayeni azaldır və ümumi yüngüllük hissi yaradır.

Qəhvədən fərqli olaraq, bu içki mədəni qıcıqlandırmır və orqanizmdə stress hormonunun kəskin artmasına səbəb olmur. Xüsusilə səhərlər halsızlıq, ağız quruluğu və ağırlıq hissi yaşayan insanlar üçün kərəvizli smuzi daha uyğun hesab edilir. İçkidən təxminən 15–20 dəqiqə sonra bədəndə rahatlıq və təravət hissi yaranır.

Mütəxəssislər bildirirlər ki, qəhvə sinir sistemini kənardan məcburi şəkildə oyadırsa, kərəvizli smuzi orqanizmin təbii fəaliyyətini dəstəkləyir. Bu içki qan dövranını yaxşılaşdırır, maddələr mübadiləsini yumşaq şəkildə sürətləndirir və enerji səviyyəsində kəskin eniş-yoxuş yaratmır. Üstəlik, smuzi qəbulundan sonra ürəkdöyünmə, əllərin əsiməsi və ya növbəti fincana ehtiyac hissi yaranmır.