Yüksək qan təzyiqi (hipertoniya) olan şəxslər üçün gündəlik qidalanma böyük əhəmiyyət daşıyır. Düzgün seçilməyən çörək növü təzyiqin yüksəlməsinə səbəb ola bilər, düzgün seçim isə ürək-damar sağlamlığını dəstəkləyir.

Foodinfo.az xəbər verir ki, hipertoniya zamanı əsas diqqət yetirilməli məqam çörəyin tam taxıllı və az duzlu olmasıdır. Bu baxımdan ağ undan hazırlanmış çörəklər ən az tövsiyə edilənlər sırasındadır. Belə çörəklər lif baxımından kasıb, glisemik indeksi isə yüksəkdir.

Tam buğda çörəyi yüksək təzyiq üçün ən faydalı seçimlərdən biridir. Tərkibində olan lif, maqnezium və kalium qan damarlarının elastikliyini artırmağa və təzyiqin tənzimlənməsinə kömək edir.

Digər faydalı seçim isə çovdar çörəyidir. Xüsusilə tam çovdar unundan hazırlanan çörəklər uzunmüddətli toxluq hissi yaradır və qan şəkərinin kəskin yüksəlməsinin qarşısını alır. Bu da təzyiqin stabilləşməsinə müsbət təsir göstərir.

Fermentləşdirilmiş və cücərdilmiş taxıllardan hazırlanan çörəklər də hipertoniya xəstələri üçün münasib hesab olunur. Bu çörəklər daha asan həzm olunur və mineralların orqanizm tərəfindən mənimsənilməsini yaxşılaşdırır.

Eyni zamanda xəbərdarlıq edilir ki, çörək seçərkən etiketlər diqqətlə oxunmalıdır. Natrium (duz) miqdarı yüksək olan sənaye çörəkləri təzyiqin artmasına səbəb ola bilər. Günlük çörək istehlakı da normadan artıq olmamalıdır.

Yüksək təzyiqi olanlar üçün ən doğru seçim tam taxıllı, liflə zəngin və az duzlu çörəklərdir. Bu cür qidalanma ümumi sağlamlığın qorunmasına və qan təzyiqinin nəzarətdə saxlanmasına kömək edir.