Alış-veriş zamanı tez-tez rastlaşdığımız bir hal var: aldığımız yaşıl banan bir neçə günə evdə saralıb şirinləşir, lakin tam yetişməmiş çiyələk dərildiyi kimi qalır və zamanla sadəcə xarab olur. Bəs bunun səbəbi nədir?
Foodinfo.az xəbər verir ki, botanika elmində meyvələr yetişmə xüsusiyyətlərinə görə iki əsas qrupa bölünür: klimakterik və qeyri-klimakterik meyvələr.
Klimakterik meyvələr: "Yolda yetişənlər"
Bu qrupa daxil olan meyvələr dərildikdən sonra da yetişməyə davam edir. Bunun əsas səbəbi həmin meyvələrin daxilində etilen qazının sintezinin davam etməsidir. Etilen bir növ "yetişmə hormonu" rolunu oynayır. Hətta bu meyvələri yaşıl halda dərıb uzaq məsafələrə daşımaq daha əlverişlidir, çünki onlar piştaxtaya çatana qədər lazımi dada və rəngə sahib olurlar.
Bu qrupa daxildir: Banan, alma, armud, manqo, avokado, qarağat, şaftalı və pomidor.
Qeyri-klimakterik meyvələr: "Budaqda qalanlar"
Bu meyvələr isə yalnız bitkiyə bağlı olduqları müddətdə yetişirlər. Dərildikləri andan etibarən onlarda etilen hasilatı və şəkərliliyin artması prosesi dayanır. Əgər siz kal (yetişməmiş) çiyələk və ya üzüm dərsinizsə, onlar heç vaxt şirinləşməyəcək, sadəcə turşuluğunu qoruyub yumşalacaq və çürüməyə başlayacaq.
Bu qrupa daxildir: Çiyələk, üzüm, sitrus meyvələri (limon, portağal), gilas, gilas və moruq.
Mətbəxdə kiçik hiylə
Klimakterik meyvələrin bu xüsusiyyətindən məişətdə istifadə etmək olar. Məsələn, bərk bir avokadonun tez yumşalmasını istəyirsinizsə, onu kağız paketin içində banan və ya alma ilə bir yerdə saxlayın. Almanın ifraz etdiyi bol etilen qazı avokadonun yetişməsini sürətləndirəcək.
