Böyrəküstü vəz orqanizmin stressə dözümlülüyünü və immun sisteminin fəaliyyətini tənzimləyən vacib orqandır. Foodinfo.az bildirir ki, tibb elmləri namizədi, ginekoloq-endokrinoloq və klinik psixoloq Maria Konovalova açıqlayıb ki, qəhvə və digər tərkibində kofein olan içkilərdən imtina etmək böyrəküstü vəzin sağlamlığını qorumağa kömək edir.

Ekspert vurğulayıb ki, böyrəküstü vəzin normal fəaliyyəti həm stresslə mübarizədə, həm də orqanizmin infeksiya və xərçəngə qarşı müdafiəsində mühüm rol oynayır. Həkim qeyd edib ki, bu orqanın sağlamlığı insanın ümumi fiziki və psixoloji vəziyyətini müəyyən edir və həyat keyfiyyətinə birbaşa təsir göstərir.

Böyrəküstü vəz zəiflədikdə tez-tez yorğunluq, sürətli əzginlik, yuxusuzluq, diqqət zəifliyi, qarın və bel nahiyəsində çəki artımı, əzələ zəifliyi, ödem, saç tökülməsi, göz altı qaralması, şirniyyata həvəs və mövsümi depresiya halları müşahidə oluna bilər.

Maria Konovalova tövsiyə edir ki, tərkibində kofein olan içkilər yerinə daha təbii və sağlam alternativlər seçilsin. Bunlara çörəkotu içkisi, sedir və şam ağacı ekstraktı, fermentləşdirilmiş Ivan-çayı və digər bitki əsaslı içkilər daxildir. Bu içkilər böyrəküstü vəzin fəaliyyətini dəstəkləyir və orqanizmin stressə qarşı müqavimətini artırır.

Həkim əlavə edib ki, sağlam həyat tərzi, düzgün qidalanma, kifayət qədər yuxu və aktiv hərəkət də böyrəküstü vəzin normal fəaliyyətini qorumağın əsas amillərindəndir.