Qidalanma yalnız nə yediyimizlə deyil, nə vaxt yediyimizlə də birbaşa bağlıdır və bu amil sağlamlıq üçün həlledici rol oynayır. Foodinfo.az BB.LV saytına istinadla xəbər verir ki, məşhur Çin həkimi Ma Çi günün müxtəlif saatlarına uyğun qidalanma rejiminin orqanizmin fəaliyyətinə ciddi təsir göstərdiyini bildirir. Onun sözlərinə görə, bədənin enerji axını günəş ritmlərinə uyğun dəyişir və bu ritmə uyğun qidalanmaq daha effektiv nəticə verir.

Mütəxəssis qeyd edir ki, səhər saat 07:00–09:00 aralığı səhər yeməyi üçün ən ideal vaxtdır, çünki bu dövrdə mədə maksimum aktiv olur və zülallar daha yaxşı mənimsənilir. Bu səbəbdən səhər yeməyi zülalla zəngin olmalıdır, çünki yalnız sıyıq kimi qidalar orqanizmin ehtiyaclarını tam qarşılamır. Günorta yeməyi isə 13:00–15:00 saatları arasında qəbul edilməlidir; bu vaxt nazik bağırsaq aktiv olur və qəbul edilən qidalar daha səmərəli həzm olunur. Bu zaman balanslı – zülal, yağ və karbohidratlarla zəngin qidalanma tövsiyə edilir.

Axşam yeməyinin isə 17:00–19:00 saatlarından gec olmaması məsləhətdir. Bu dövrdə böyrəklərin fəaliyyəti üstünlük təşkil edir və ağır qidalar həzmi çətinləşdirə bilər. Həkim axşam saatlarında çox yeməməyin vacibliyini vurğulayır və xüsusilə ədviyyəli və ağır ət yeməklərindən uzaq durmağı tövsiyə edir. Qədim Çin mənbələrində də qeyd olunur ki, yüngül axşam yeməyi uzunömürlülüyə töhfə verir.

Araşdırmalar göstərir ki, bu cür qidalanma rejiminə əməl edən insanlarda bədən yağının azalması, qan şəkərinin aşağı düşməsi və xolesterin göstəricilərinin yaxşılaşması müşahidə olunur. Beləliklə, düzgün vaxtda qidalanmaq həm arıqlamağa, həm də ümumi sağlamlığın qorunmasına kömək edən sadə, lakin effektiv üsullardan biridir.