İnsan ömrünün keyfiyyəti və uzunluğu bir çox amildən asılıdır və onların ən vaciblərindən biri düzgün qidalanmadır. Gənc yaşlardan balanslı və zəngin rasiona riayət etmək hər zaman mümkün olmur və illər ərzində zərərli qida vərdişləri formalaşa bilir. Foodinfo.az BB.LV-yə istinadla xəbər verir ki, 60 yaşdan sonra bəzi əsas qidalanma prinsiplərinə əməl etmək sağlamlığı qorumaq və enerjili qalmaq üçün xüsusi əhəmiyyət daşıyır.
Mütəxəssislər ilk növbədə emal olunmuş məhsulların — fastfud, tez hazırlanan yeməklər, dondurulmuş yarımfabrikatlar, kolbasalar və şirniyyatların — istehlakını azaltmağı tövsiyə edirlər. Bu qidalar əlçatan olsa da, tərkibində faydalı vitamin və minerallar az, süni dadlandırıcı və qatqılar isə çoxdur.
Yaşlı insanlar üçün tam taxıllı məhsulların, tərəvəzlərin, meyvələrin və quru meyvələrin payını artırmaq faydalıdır. Onlar liflə zəngindir və həzm sistemini yaxşılaşdırmaqla yanaşı, diabet riskini də azaldır. Bununla belə, lif qəbulunu tədricən artırmaq vacibdir ki, orqanizm uyğunlaşa bilsin. Duzun miqdarı isə əksinə, azaldılmalı və həddindən artıq duzlu yeməklərdən uzaq durulmalıdır.
Maraqlıdır ki, yeməklərə ədviyyat əlavə etmək də sağlamlığa müsbət təsir göstərə bilər. Yeni ədviyyatları rasiona ehtiyatla daxil etmək tövsiyə olunur. Bundan əlavə, bir çox insan meyvə və tərəvəzlərin qabığını soyur, halbuki faydalı maddələrin böyük hissəsi məhz qabıqda olur. Məsələn, kartof qabığında antioksidantlar lətindən 12 dəfə çoxdur, həmçinin kalium və maqneziumla zəngindir.
Yaş artdıqca kalsiumun əhəmiyyəti də yüksəlir. Sümüklərin möhkəmliyi və diş sağlamlığı üçün gündəlik rasionda süd məhsulları, yumurta, qoz-fındıq və dəniz balığının olması tövsiyə edilir.
Mütəxəssislər sonda vacib bir məqama da diqqət çəkirlər: kifayət qədər kalori qəbul etmək lazımdır. 60 yaşdan sonra ciddi kalori çatışmazlığı çəki azalmasına deyil, əksinə, əzələ kütləsinin azalmasına, sümüklər və oynaqlar üçün dəstəyin zəifləməsinə səbəb ola bilər. Sağlam qidalanma isə bu yaşda aktiv və keyfiyyətli həyatın əsas açarlarından biridir.
