Tibb mütəxəssisləri xolesterolun orqanizm üçün vacib, lakin balansı pozulduqda təhlükəli ola bilən bir maddə olduğunu bildirir.
Foodinfo.az xəbər verir ki, xolesterol qanda olan yağabənzər maddədir və hüceyrələrin qurulması, hormonların və bəzi vitaminlərin hazırlanması üçün lazımdır. O, əsasən iki növə bölünür: “yaxşı” hesab edilən HDL və “pis” hesab edilən LDL xolesterol. HDL damarları qoruyur, LDL isə artdıqda damar divarlarında yığılaraq problemlərə səbəb ola bilər.
Yüksək xolesterolun ən təhlükəli tərəfi onun uzun müddət heç bir açıq əlamət verməməsidir. Bu səbəbdən bir çox insan problemdən gec xəbər tutur.
Bununla belə, bəzi hallarda aşağıdakı əlamətlər müşahidə oluna bilər:
– Tez yorulma və halsızlıq
– Başgicəllənmə
– Sinə nahiyəsində ağırlıq və ya narahatlıq hissi
– Ayaqlarda ağrı (xüsusilə yeriyərkən)
– Dəridə, xüsusilə göz ətrafında sarımtıl yağ yığıntıları
Bu əlamətlər yalnız xolesterolla bağlı olmaya bilər, lakin risk siqnalı kimi qiymətləndirilməlidir.
Yüksək xolesterol vaxtında nəzarət altına alınmazsa, ürək-damar xəstəlikləri riskini artırır. Buna görə də mütəmadi qan analizi vermək, sağlam qidalanmaq və aktiv həyat tərzi sürmək tövsiyə olunur.
