Rusiya Səhiyyə Nazirliyinin akademik V.İ. Şumakov adına Milli Tibbi Tədqiqat Mərkəzinin Nefrologiya şöbəsinin müdiri, həkim-nefroloq Natalya Çebotaryova qara çayın orqanizmə təsiri barədə danışıb. Foodinfo.az xəbər verir ki, onun sözlərinə görə, bu içki bəzi insanlarda sağlamlıq üçün risk yarada bilər.

Mütəxəssis bildirib ki, xüsusilə güclü dəmlənmiş və isti halda içilən qara çay yüksək təzyiqdən əziyyət çəkənlər üçün təhlükəli ola bilər. Çünki tərkibindəki kofein arterial təzyiqi artırır. Bundan əlavə, çaya əlavə olunan bəzi meyvə və bitkilər də böyrəklərə mənfi təsir göstərə bilər.

Çebotaryova qeyd edib ki, az və ya orta miqdarda qara çay qəbul etmək sağlam qidalanmanın bir hissəsi ola bilər. Lakin normanı aşmamaq əsas şərtdir. Onun sözlərinə görə, gündə 4 stəkandan artıq çay içmək tövsiyə olunmur.

Ekspert xüsusi olaraq bitki çaylarına da diqqət çəkib. Bəzi bitkilərin böyrəklərə faydalı təsiri olsa da, ayrı-ayrı komponentlərin toksik təsirini təsdiqləyən elmi məlumatlar da mövcuddur. Bu səbəbdən, hətta faydalı hesab edilən bitki çayları da normadan artıq qəbul edilməməlidir.

Həkim minta, zəncəfil və çobanyastığı kimi bitkilərin nisbətən təhlükəsiz olduğunu vurğulayıb. Lakin o da əlavə edib ki, bu cür çaylar belə çox miqdarda qəbul edildikdə qanda kalium səviyyəsini yüksəldə bilər ki, bu da böyrək xəstələri üçün risklidir.

Beləliklə, həkim-nefroloqların ümumi tövsiyəsi aydındır: qara çayı və bitki dəmləmələrini ölçülü şəkildə qəbul etmək sağlamlıq üçün daha təhlükəsizdir.