Son illər üzərində “təbii”, “orqanik” və ya “yüksək zülallı” yazılan məhsullar bir çox insan üçün avtomatik olaraq sağlam seçim kimi qəbul olunur. Foodinfo.az Sports.kz-ə istinadən xəbər verir ki, amerikalı qidalanma mütəxəssisləri bu cür məhsulların bir hissəsinin əslində xeyli miqdarda gizli şəkər ehtiva etdiyini bildirirlər. Araşdırmalar göstərir ki, qranola, bitki əsaslı içkilər, yağsız qatıq növləri və hazır smuzilər sağlam görüntüyə baxmayaraq yüksək şəkər yükü daşıya bilər. Bu barədə “The Associated Press” məlumat yayıb.
Mütəxəssislər vurğulayırlar ki, şəkərin normadan artıq qəbulu piylənmə, şəkərli diabet və ürək-damar xəstəlikləri riskini artırır. Statistikaya əsasən, ABŞ sakinləri gündə orta hesabla 17 qram əlavə şəkər qəbul edir və bu miqdarın böyük hissəsi yalnız şirniyyat və içkilərdən deyil, həm də çörək, souslar, süd məhsulları və hazır yeməklərdən gəlir. Qeyd olunur ki, istehsalçılar getdikcə daha çox marketinq üsullarından istifadə edərək alıcıların diqqətini məhsulun real tərkibindən yayındırırlar.
Nevroelm və psixiatriya üzrə professor Nikol Avena bildirir ki, istehlakçılar “şəkər” sözündən çəkinməyə başladıqca, istehsalçılar alternativ yollar tapır. Onun sözlərinə görə, qablaşdırmada terminlər dəyişdirilir, diqqət fərqli maddələrə yönəldilir və nəticədə məhsul əvvəlkindən də şirin ola bilir. 2021-ci ildən etibarən əlavə şəkərin miqdarının ayrıca göstərilməsi məcburi olsa da, bu, bəzi hallarda gözlənilməz nəticə verib. Şirkətlər eritritol və ya rahib meyvəsi ekstraktı kimi alternativ şirinləşdiricilərə daha çox üstünlük verməyə başlayıblar.
Diyetoloq və professor Kollin Popp qeyd edir ki, mövcud tövsiyələr gündəlik kalorinin 10 faizinə qədərinin əlavə şəkərdən gəlməsinə icazə verir. Lakin onun fikrincə, bu göstərici yüksəkdir və ideal halda 5 faizdən aşağı olmalıdır. Şəkərli diabeti olan insanlar üçün isə şəkər qəbulu minimuma endirilməlidir. Ekspertlər alıcılara reklam və şüarlara deyil, məhsulun tərkibinə diqqət yetirməyi tövsiyə edirlər. Çünki badam südü, yunan qatığı və ya tam buğda çörəyi kimi məhsulların bir porsiyasında belə bir neçə çay qaşığı şəkər ola bilər.
Mütəxəssislərin fikrincə, daha etibarlı yol sadə və neytral məhsullar seçmək, şirinliyi isə ehtiyac olduqda öz nəzarətində əlavə etməkdir. Eyni zamanda, şəkər əvəzedicilərinin də tam təhlükəsiz həll olmadığı vurğulanır. Araşdırmalar göstərir ki, məhz şirin dadın özü beyində zövq mərkəzlərini aktivləşdirir və bu da artıq yeməyə meyli artıra bilər. Buna görə əsas məqsəd tədricən şirin dada olan asılılığı azaltmaq olmalıdır.
