Ürək-damar xəstəlikləri olan insanların gündəlik qidalanmada daha diqqətli olması sağlamlıq baxımından xüsusi əhəmiyyət daşıyır. Foodinfo.az Championat-a istinadən xəbər verir ki, britaniyalı ailə həkimi Kris Stil ürək dərmanları qəbul edən pasiyentlərə məşhur şirniyyatlardan biri ilə bağlı mühüm xəbərdarlıq edib. Onun sözlərinə görə, bəzi şirinliklərin, xüsusilə də biyan kökü tərkibli məhsulların qəbulu ciddi sağlamlıq riskləri yarada bilər.

Mütəxəssis bildirib ki, biyan kökünün tərkibində olan qlitsirizin maddəsi ürək dərmanları ilə təhlükəli qarşılıqlı təsirə girir. Xüsusilə ürək çatışmazlığı və ritm pozuntularının müalicəsində istifadə olunan diqoksin preparatı ilə birlikdə qəbul edildikdə bu maddə ürək döyüntüsünün pozulmasına səbəb ola bilər. Həkimin sözlərinə görə, bəzi hallarda bu vəziyyət infarkt riskini də artıra bilər.

Kris Stil qeyd edib ki, biyan kökü eyni zamanda orqanizmdə kalium səviyyəsini aşağı salır. Bu isə diqoksinin zəhərləyici təsirini gücləndirərək təhlükəli vəziyyət – diqitalis intoksikasiyası ilə nəticələnə bilər. Belə hallarda ürək ritmində ciddi pozuntular, güclü halsızlıq və qıcolmalar müşahidə oluna bilər.

Həkim vurğulayıb ki, bu risk yalnız ürək dərmanları qəbul edən şəxslərlə məhdudlaşmır. Eyni zamanda sidikqovucu preparatlardan və arterial təzyiqi salan dərmanlardan istifadə edən insanlar üçün də təhlükə mövcuddur. Belə hallarda aritmiya və ümumi zəiflik ehtimalı daha da artır.

Mütəxəssis ürək-damar xəstəlikləri olan, yüksək təzyiqdən əziyyət çəkən və mütəmadi dərman qəbul edən şəxslərə biyan kökü tərkibli məhsullardan istifadə etməzdən əvvəl həkimlə məsləhətləşməyi tövsiyə edib. O bildirib ki, bu xəbərdarlıq təkcə konfetlərə deyil, eyni zamanda bəzi şirniyyatlara, içkilərə, çaylara və qida əlavələrinə də aiddir.

Həkimin fikrincə, düzgün məlumatlanma və şüurlu qida seçimi sağlamlıq risklərinin qarşısını almağa kömək edir və ürək xəstələrinin gündəlik həyat keyfiyyətini qorumaqda mühüm rol oynayır.