Dadlandırılmış və şirin yoqurtlar ən çox seçilən ara qidalardan biri olsa da, mütəxəssislər onların tərkibinə diqqət yetirməyin vacibliyini bildirirlər. Foodinfo.az Sports.kz saytına istinadla xəbər verir ki, qidalanma üzrə ekspertlər bu məhsulların bəzən düşündüyümüz qədər faydalı olmadığını vurğulayırlar.

Mütəxəssislərin əsas narahatlığı əlavə şəkərin yüksək miqdarı ilə bağlıdır. Onların sözlərinə görə, bir porsiyada 8–10 qramdan artıq şəkər olmaması tövsiyə edilir, ideal variant isə ümumiyyətlə əlavə şəkərsiz məhsullardır. Şəkər tərkibdə müxtəlif adlarla – yüksək fruktozalı şərbət və ya meyvə konsentratı kimi – gizlənə bilər. Bundan əlavə, bəzi dadlandırılmış yoqurtlarda süni ətirvericilər, şirinləşdiricilər və rəngləndiricilər mövcuddur. Qatı konsistensiya yaratmaq üçün istifadə edilən bəzi qatılaşdırıcıların da həzm sisteminə mənfi təsir göstərə biləcəyi qeyd olunur.

Bununla belə, mütəxəssislər vurğulayırlar ki, təbii yoqurt özü-özlüyündə faydalı məhsuldur. O, zülal, kalsium və probiotiklərlə zəngindir, bağırsaq mikroflorasını dəstəkləyir. Tövsiyə olunur ki, tərkibi qısa və aydın olan yoqurtlara üstünlük verilsin, şirinlik isə təbii meyvələr vasitəsilə əlavə edilsin. Belə yanaşma həm sağlamlığı qorumağa, həm də balanslı qidalanmanı təmin etməyə kömək edir.