Yaz aylarının yaxınlaşması ilə gənələrin aktivliyi də artır. Alimlər bildirirlər ki, bu parazitlər insanı təsadüfi seçmir və müəyyən bioloji siqnallara əsaslanaraq “qurban” tapırlar.

Foodinfo.az xarici mediaya istinadla xəbər verir ki, Perm Politex Universitetinin tədqiqatçıları gənələrin insanları karbon qazının qoxusu, dəri səthindəki yağ turşularının aromatı və bədən istiliyi kimi siqnallar vasitəsilə müəyyən etdiyini açıqlayıblar.

Mütəxəssislərin sözlərinə görə, yüksək testosteron səviyyəsinə malik kişilər gənələr üçün daha cəlbedici ola bilər. Bu hormon piy və tər vəzilərinin fəaliyyətini gücləndirir və nəticədə parazitləri cəlb edən xüsusi qoxu mühiti yaradır.

Araşdırmaya görə, hamilə qadınlar da risk qrupuna daxil edilir. Hormonal dəyişikliklər onların tərinin tərkibini dəyişdirir və bədən temperaturunu bir qədər artırır. Bu isə gənələrin onları daha asan aşkar etməsinə səbəb ola bilər.

Alimlər bildirirlər ki, uşaqlar da tez-tez gənə dişləməsi ilə üzləşə bilər. Bunun əsas səbəbi onların boyunun nisbətən aşağı olması və ot-bitki örtüyü ilə daha çox təmasda olmalarıdır.

Tədqiqatçılar həmçinin ev heyvanlarına diqqət yetirməyi tövsiyə edirlər. Xüsusilə uzun tüklü heyvanlar gənələri daha çox cəlb edə bilər, çünki sıx tük örtüyü parazitlər üçün isti və rütubətli mühit yaradır. Bununla yanaşı, alimlər qeyd edirlər ki, maddələr mübadiləsinin və tərləmənin zəifləməsi səbəbindən yaşlı insanlar gənələr üçün nisbətən az cəlbedici ola bilər.