Bir çox hallarda onkoloji xəstəliklər gec mərhələdə aşkar edilir və bunun əsas səbəbi insanların ilkin əlamətlərə yetərincə diqqət ayırmamasıdır. Foodinfo.az Sports.kz-yə istinadla xəbər verir ki, mədə-bağırsaq sistemi üzrə mütəxəssis Andrey Simakov profilaktik müayinələrdən yayınmağın və orqanizmdə baş verən dəyişiklikləri gözdən qaçırmağın riskləri barədə danışıb.

Həkimin sözlərinə görə, bəzi bədxassəli şişlər özünü qəfil əlamətlərlə göstərə bilər. Bunlara mədə-bağırsaq sistemi və ya cinsiyyət yollarından qanaxmalar, eləcə də qadınlarda süd vəzisində təsadüfən aşkar edilən bərkimələr daxildir. Bu kimi hallar vaxtında həkimə müraciət olunduqda erkən diaqnoz üçün imkan yaradır.

Simakovun vurğuladığı ən geniş yayılmış, lakin tez-tez nəzərə alınmayan əlamətlərdən biri səbəbsiz çəki itkisidir. Bəzi insanlar bunu yaşla əlaqələndirir, digərləri isə arıqlamağa sevinərək təhlükəni ciddiyə almırlar. Halbuki, izah olunmayan çəki azalması bir sıra ciddi xəstəliklərin ilkin siqnalı ola bilər.

Mütəxəssis qeyd edib ki, xüsusilə aşağı ətraf venalarının problemləri olan bəzi pasiyentlərdə qəfil tromboz və damar iltihabları yarana bilər. Əvvəllər müalicə olunmuş və ya cərrahi müdaxilə keçirmiş şəxslərdə bu vəziyyət diqqətdən kənarda qalmamalıdır.

Həkimin sözlərinə görə, beyin şişləri zamanı da bəzi əlamətlər səhv başa düşülə bilər. Məsələn, uzun müddət səbəbsiz davam edən ürəkbulanma xəstələri tez-tez mədə-bağırsaq mütəxəssislərinə yönəldir, halbuki problemin mənbəyi tam fərqli ola bilər.

Mütəxəssislər bildirirlər ki, orqanizmdə yaranan qeyri-adi dəyişikliklərə diqqətli yanaşmaq, mütəmadi tibbi müayinələrdən keçmək və şübhəli əlamətlər zamanı vaxt itirmədən həkimə müraciət etmək sağlamlığın qorunmasında mühüm rol oynayır. Erkən diqqət isə çox vaxt müalicənin uğurla nəticələnməsinə imkan yaradır.