Mətbəxdə geniş istifadə olunan bəzi ədviyyatlar yalnız yeməklərə xüsusi dad verməklə kifayətlənmir, həm də sağlamlığa müsbət təsir göstərə bilər. Son elmi araşdırmalar sarıkökün tərkibində olan kurkumin maddəsinin yaddaşın möhkəmlənməsinə və əhval-ruhiyyənin yaxşılaşmasına kömək edə biləcəyini göstərib. Foodinfo.az BB.LV saytına istinadla xəbər verir ki, ABŞ alimlərinin apardığı tədqiqat bu sahədə diqqətçəkən nəticələr ortaya qoyub. Mütəxəssislərin sözlərinə görə, kurkumin xüsusilə orta və yaşlı yaş qrupunda olan insanların beyin fəaliyyətinə müsbət təsir göstərə bilər.
Araşdırma Kaliforniyada fəaliyyət göstərən Uzunömürlülük Mərkəzinin alimləri tərəfindən həyata keçirilib. Tədqiqata yaşı 51-84 arasında dəyişən, yüngül yaddaş problemləri olan 40 nəfər cəlb edilib. İştirakçılar 18 ay ərzində gündə iki dəfə təxminən 90 milliqram kurkumin qəbul ediblər. Bu müddətin sonunda onların koqnitiv funksiyaları yenidən qiymətləndirilib.
Araşdırmanın müəlliflərindən biri, amerikalı psixiatr və neyrobiologiya üzrə mütəxəssis Qari Smoll bildirib ki, iştirakçılar müxtəlif yaddaş testlərində orta hesabla 28 faiz daha yüksək nəticə göstəriblər. Onun sözlərinə görə, kurkuminin antioksidant və iltihabəleyhinə xüsusiyyətləri beyin hüceyrələrinin fəaliyyətinin qorunmasına kömək edə bilər. Alim hesab edir ki, bu maddə yaddaş və emosional vəziyyətə cavabdeh olan beyin nahiyələrində zərərli dəyişikliklərin qarşısının alınmasına dəstək verir.
Tədqiqat müəllifləri qeyd edirlər ki, kurkuminin təsiri onun orqanizmdə iltihabi prosesləri azaltmaq qabiliyyəti ilə əlaqədar ola bilər. Məhz bu xüsusiyyət sayəsində maddənin yaşla bağlı yaddaş zəifləməsinin qarşısının alınmasına müəyyən töhfə verdiyi düşünülür. Alimlər həmçinin bildirirlər ki, kurkuminin təsir mexanizmlərinin daha dəqiq müəyyənləşdirilməsi üçün əlavə araşdırmalara ehtiyac var.
Mütəxəssislər vurğulayırlar ki, sarıkök sağlam qidalanmanın faydalı elementlərindən biri hesab olunsa da, onun tibbi məqsədlərlə istifadəsi həkim məsləhəti əsasında aparılmalıdır. Bununla yanaşı, gündəlik rasionda sarıkökdən istifadə orqanizmin ümumi sağlamlığının dəstəklənməsinə və beyin funksiyalarının qorunmasına kömək edə bilər.
