Badam təkcə dadlı və ləzzətli qida deyil, həm də orqanizmin sağlamlığı üçün zəruri olan çoxsaylı qida maddələrini ehtiva edən təbii enerji mənbəyidir.

Foodinfo.az xəbər verir ki, gündəlik yalnız bir ovuc çiy badam qəbul etmək ürək-damar sistemini gücləndirir və xolesterol səviyyəsini tənzimləyərək ürək xəstəlikləri riskini azaldır.

Badamın zəngin tərkibində olan E vitamini hüceyrələrin oksidləşmə nəticəsində erkən qocalmasının qarşısını alır və dəri sağlamlığını qoruyur. Onun yüksək lif tərkibi isə həzm prosesini asanlaşdırır, mədə-bağırsaq sistemini tənzimləyir və uzun müddət toxluq hissi yaradır, beləliklə, artıq yemə ehtiyacını azaldır.

Bundan əlavə, badam tərkibində olan maqnezium sinir sisteminin normal işləməsini dəstəkləyir, stress və yorgunluğun qarşısını almağa kömək edir. Diabet xəstələri üçün də faydalıdır, çünki qan şəkərinin səviyyəsini balansda saxlamağa yardım edir və qlükozanın idarə edilməsində mühüm rol oynayır.

Badamın sağlam yağları bədənin yağ yandırma prosesinə mane olmur, əksinə, balanslı qidalanmanı təmin edərək arıqlamağa dəstək verir. Enerji verir, yaddaşı gücləndirir və ümumi bədən tonusunu artırır.

Gündəlik rasiona əlavə ediləcək yalnız bir ovuc badam uzun müddətdə orqanizmin funksiyalarını optimallaşdırır və sağlam həyat tərzinin qorunmasına mühüm töhfə verir. Bu sadə vərdişlə sağlamlığınızı və özünüzü daha yaxşı hiss edə bilərsiniz.