Alimlər gözlənilməz bir maddənin həm artıq çəki, həm də beyin xəstəliklərinə qarşı mübarizədə faydalı ola biləcəyini müəyyən ediblər. Söhbət əsasən kakao və şokoladın tərkibində olan teobromin adlı birləşmədən gedir. Bu maddənin insan sağlamlığına təsiri ilə bağlı aparılan araşdırmalar ümidverici nəticələr ortaya qoyub.

Foodinfo.az Doctorpiter-ə istinadla xəbər verir ki, Çinin Çjençjou Universitetinin tədqiqatçıları teobrominin təsir mexanizmlərini analiz edərək onun bir sıra faydalı xüsusiyyətlərə malik olduğunu müəyyən ediblər. Xüsusilə bu maddə kakaoda və tünd şokoladda yüksək miqdarda olur. Araşdırmalara görə, teobromin maddələr mübadiləsini aktivləşdirərək yağların parçalanmasını sürətləndirir və bu da arıqlama prosesinə müsbət təsir göstərir.

Mütəxəssislər bildirir ki, teobromin həmçinin beyin funksiyalarını yaxşılaşdırır, Alzheimer xəstəliyi və Parkinson xəstəliyi riskini azalda bilər. Bundan əlavə, onun antioksidant və iltihabəleyhinə xüsusiyyətləri immun sistemini gücləndirir, böyrəklərdə daş əmələ gəlməsinin qarşısını alır və ürək-damar sağlamlığını dəstəkləyir.

Alimlər hesab edir ki, teobrominin beyin xəstəlikləri, o cümlədən insult və depressiya üzərində təsirinin daha dərindən araşdırılması vacibdir. Eyni zamanda, bu maddənin piylənməyə qarşı mübarizədə rolu da gələcək tədqiqatlar üçün mühüm istiqamət olaraq qalır.