Zapekanka həm hazırlanması asan, həm də müxtəlif ərzaqlarla zənginləşdirilə bilən praktik yeməklərdən biridir. Dünyanın bir çox mətbəxində bu təamın tərəvəzli, ətli, balıqlı və makaronlu növləri geniş yayılıb. Foodinfo.az BB.LV saytına istinadla xəbər verir ki, bu dəfə təqdim olunan dəniz məhsulları və brokkoli ilə zapekanka həm yüngül, həm də qida dəyəri baxımından olduqca faydalıdır.

Bildirilir ki, zapekankanın əsas üstünlüyü inqrediyentlərin bağlayıcı qarışıqla birləşdirilərək sobada bişirilməsidir. Bu üsul həm vaxt itkisini azaldır, həm də məhsulların təbii dadını qoruyur. Üstəlik, belə yeməklər çox zaman artıq qalan ərzaqlardan səmərəli istifadə etməyə imkan yaradır.

Mütəxəssislər axşam saatlarında ağır yeməklər əvəzinə zülal və vitaminlə zəngin, yüngül təamların seçilməsini tövsiyə edirlər. Dəniz məhsulları və brokkoli ilə hazırlanan zapekanka bu baxımdan ideal seçim hesab olunur.

Lazım olan ərzaqlar:

• Dəniz kokteyli – 500 qram

• Brokkoli – 400 qram

• Yumurta – 2 ədəd

• Süd – 100 ml

• Sərt pendir – 100 qram

• Zeytun yağı – 3 xörək qaşığı

• Duz və istiota görə

Hazırlanma qaydası:

Yumurta, süd və ədviyyatlar dərin qabda yaxşıca çalınır. Sərt pendir sürtgəcdən keçirilərək yarısı qarışıma əlavə olunur. Xırda hissələrə bölünmüş brokkoli və əvvəlcədən əridilmiş dəniz kokteyli bu kütləyə qatılır. Qarışıq soba qabına tökülür və üzərinə qalan pendir səpilir.

Əvvəlcədən qızdırılmış sobada 15–20 dəqiqə bişirildikdən sonra yemək hazır olur. Süfrəyə verilərkən üzəri göyərti ilə bəzədilə bilər.

Qısa vaxtda hazırlanan bu ləzzətli və faydalı zapekanka ailəvi şam yeməyi üçün əla seçimdir.