Mağazalardan hazır yemək alanlar üçün yeni məsləhətlər açıqlanıb. Foodinfo.az xəbər verir ki, Lenta.ru-ya danışan “Qanun və sağlamlıq” fondunun “Qida məhsulları” şöbəsinin rəhbəri Olqa Aniçenkova hazır yemək seçərkən son istifadə müddətinin ən azı iki–dörd gün qalmasına üstünlük verməyi məsləhət görüb. Məlumat Sports.kz tərəfindən yayılıb.

Mütəxəssis bildirib ki, bəzi mağazalar istifadə müddəti bitmək üzrə olan məhsulların qiymətini aşağı salır və bu, alıcıya sərfəli görünə bilər. Lakin Aniçenkovanın sözlərinə görə, belə məhsullar görünüşcə normal olsa da, artıq keyfiyyətini itirməyə başlaya bilər və təhlükəsizliyi şübhə doğura bilər.

O əlavə edib ki, hazır yeməklərin düzgün şəraitdə saxlanması da vacibdir. Aniçenkova qeyd edib ki, belə məhsullar +2…+6 °C temperaturda saxlanılmalıdır. Bu təmin edilmədikdə hazır yeməyin keyfiyyəti tez bir zamanda pisləşə, qida zəhərlənməsi riski arta bilər.

Mütəxəssislər alıcılara tövsiyə edir ki, hazır yemək alarkən qablaşdırmanın bütövlüyünə, saxlanma şəraitinə və son istifadə müddətinə mütləq diqqət yetirsinlər.