Uşaqlarda C vitamini çatışmazlığı xüsusilə soyuq mövsümdə daha çox müşahidə olunur. Foodinfo.az KP.ru-ya istinadla xəbər verir ki, pediatr və neonatoloq Yelena Rusakova bu çatışmazlığın hansı hallarda özünü göstərdiyini və valideynlərin nələrə diqqət etməli olduğunu açıqlayıb.

Həkimin sözlərinə görə, C vitamini qıtlığının ən başlıca səbəbləri təzə meyvə-tərəvəzin az qəbulu, qidalanmada fastfudun çoxluğu və tərəvəzlərin əsasən bişmiş şəkildə yeyilməsi ilə bağlıdır. O bildirir ki, qış və yaz aylarında təzə məhsulların azlığı uşaqlarda vitamin çatışmazlığını daha da artırır.

C vitamini çatışmazlığı bir sıra narahatlıq doğuran əlamətlərlə özünü göstərir. Mütəxəssis qeyd edir ki, belə uşaqlarda halsızlıq, davamlı yorğunluq, zəiflik və iştahsızlıq müşahidə olunur. Bundan əlavə, damarların kövrəkləşməsi səbəbindən diş ətlərinin qanaması, dəridə göyərmələr və xırda qan sızmaları görünə bilər. Bu vəziyyət müdaxilə edilmədikdə daha ciddi fəsadlar yarada bilər.

Həkim bildirir ki, C vitamininin əsas mənbələri şipovnik, şirin bibər, qara qarağat, itburnu, kəvər, şüyüd, müxtəlif növ kələmlər, kartof, pomidor, alma, ananas və sitrus meyvələridir. Xüsusilə meyvə və tərəvəzin qabığında, yarpaqlarında və üst qatlarında bu vitamin daha çox olur, buna görə də yalnız iç hissəni yeməklə kifayətlənmək məsləhət görülmür.

Mütəxəssislər valideynlərə tövsiyə edirlər ki, uşaqların gündəlik qidalanmasına təzə tərəvəz və meyvələr mütləq daxil edilsin, fastfud istifadəsi azaldılsın və qışda vitamin balansını qorumaq üçün menyuya müxtəlif məhsullar əlavə olunsun.