Gündəlik qidalanmada geniş istifadə olunan yumurtanın təzəliyinin yoxlanılması sağlamlıq baxımından böyük əhəmiyyət daşıyır. Xüsusilə qida təhlükəsizliyi ilə bağlı risklərin qarşısını almaq üçün sadə və etibarlı üsulların bilinməsi vacib hesab olunur. Foodinfo.az NEWS.ru portalına istinadla xəbər verir ki, dietoloq Yelena Solomatina yumurtanın təzəliyini müəyyən etmək üçün sadə su testini tövsiyə edir.

Mütəxəssisin sözlərinə görə, bu üsulu tətbiq etmək üçün yumurtanı sadəcə su dolu qaba salmaq kifayətdir. Əgər yumurta qabın dibinə batırsa, bu onun təzə olduğunu göstərir, çünki təzə yumurtanın sıxlığı sudan yüksək olur. Əksinə, yumurta suyun üzərinə qalxırsa və ya üzürsə, bu onun köhnə olduğunu və istehlak üçün yararsız sayıldığını göstərir.

Dietoloq bildirir ki, yumurta nə qədər uzun müddət saxlanılarsa, onun daxilində və qabığında bakteriyaların, o cümlədən salmonella riskinin artma ehtimalı yüksəlir. Bu səbəbdən mütəxəssis xüsusilə 25 gündən artıq saxlanılmış yumurtaların alınmamasını və istifadə zamanı diqqətli olunmasını tövsiyə edir. Qida təhlükəsizliyinin qorunması üçün belə sadə üsulların tətbiqi gündəlik həyatda mühüm rol oynayır.