Tibb elmləri doktoru və tanınmış dietoloq Marqarita Korolyeva səhər yeməyindən imtina etməyin orqanizm üçün ciddi fəsadlara yol aça biləcəyini açıqlayıb.
Foodinfo.az xəbər verir ki, ekspertin sözlərinə görə, səhər yeməyi bədənin metabolik saatını işə salır və bütün daxili sistemlərin optimal fəaliyyətini təmin edir. Səhər yeməyini atlayan insanlarda isə gün ərzində enerji sərfi azalır və metabolizm normal sürətdə işləmir.
Korolyeva qeyd edib ki, bədən gün ərzində tələb olunan enerji ehtiyacını qarşılaya bilmədikdə, orqanizm ehtiyatda yağ saxlayır və bu da artıq çəkiyə səbəb olur. “Sadəcə enerji sərfi azaldığı üçün insanlar çəkini artırırlar”, – deyə dietoloq vurğulayıb.
O, həmçinin bildirib ki, səhər yeməyi mütləq qəbul edilməli və bu, arıqlama proqramlarının əsas hissəsi hesab olunur. Korolyeva, balanslı səhər yeməyinin gün ərzində aclıq hissini azaldaraq, qida seçimlərini daha sağlam etməyə kömək etdiyini də əlavə edib.
Dietoloq səhər yeməyinə daxil ediləcək məhsullardan danışaraq, təzə meyvələr, yulaf, süd məhsulları və tam buğda çörəyinin metabolizmi sürətləndirdiyini, bədənin enerjisini uzun müddət saxladığını qeyd edib. O həmçinin qəhvə və şəkərli içkilərlə səhər yeməyini əvəz etməyin zərərli olduğunu diqqətə çatdırıb.
Korolyeva qeyd edib ki, səhər yeməyi yalnız kilo nəzarəti üçün deyil, həm də ürək-damar, sinir sistemi və ümumi sağlamlıq üçün vacibdir. Onun sözlərinə görə, səhər yeməyini atlayan insanlar gün ərzində daha çox snak və yağlı qidalara meylli olurlar ki, bu da sağlam qidalanmaya ziyan verir.
