Soyuq qış axşamlarında bir fincan çay həm isinmək, həm də rahatlanmaq üçün ən çox seçilən içkilərdəndir. Həkimlər çayın düzgün istifadə edildikdə sağlamlıq üçün faydalı olduğunu bildirirlər. Foodinfo.az BB.LV-yə istinadla xəbər verir ki, çayın yanlış dəmlənməsi və düzgün qaydalara əməl olunmaması bu faydalı içkini sağlamlıq üçün təhlükəli hala sala bilər.
Məlumata görə, müxtəlif çay növləri orqanizmi sakitləşdirə, canlandıra və hətta uzunömürlülüyə töhfə verə bilər. Aparılan araşdırmalar çayın müntəzəm istifadəsinin ürək-damar xəstəlikləri, insult, tənəffüs yolu problemləri və bəzi xərçəng növlərinin riskini azaltdığını göstərir. Lakin mütəxəssislər vurğulayırlar ki, bu təsir yalnız çay düzgün hazırlandıqda mümkündür.
Mütəxəssislərin fikrincə, çay dəmləyərkən ən çox yol verilən səhvlər aşağıdakılardır:
Birinci səhv çayın həddindən artıq tünd dəmlənməsidir. Belə çayda olan maddələr dəmirin mənimsənilməsini çətinləşdirə bilər. Eyni zamanda, tərkibindəki stimullaşdırıcı maddələrin çoxluğu baş ağrısı və yuxusuzluq yarada bilər, sümük sağlamlığına da mənfi təsir göstərə bilər.
İkinci səhv çayın normadan artıq uzun müddət dəmlənməsidir. Bu halda çayın faydalı maddələri azalır, eyni zamanda bakteriyaların çoxalması üçün əlverişli mühit yaranır.
Üçüncü səhv çayın çox qaynar su ilə dəmlənməsidir. Mütəxəssislər bildirirlər ki, 65 dərəcədən yüksək temperaturda içilən içkilər sağlamlıq üçün təhlükəli hesab olunur və uzun müddət istifadə edildikdə ciddi problemlərə yol aça bilər.
Dördüncü səhv kiflənmiş çayın istifadəsidir. Belə çayda zərərli göbələklər əmələ gəlir və onların qəbulu başgicəllənmə, ishal, ağır hallarda isə daxili orqanların zədələnməsinə səbəb ola bilər.
Beşinci səhv isə çaya şəkər əlavə edilməsidir. Həkimlər qeyd edirlər ki, gündəlik qidalanmada şəkər artıq kifayət qədər mövcuddur və çaya əlavə edilən hər qaşıq şəkər orqanizm üçün əlavə yük yaradır.
Mütəxəssislər çayı orta dərəcədə dəmləməyi, ilıq halda içməyi və mümkün qədər şəkərsiz istifadə etməyi tövsiyə edirlər. Bu qaydalara əməl edildikdə çay həm ləzzətli, həm də sağlam içki olaraq qalır.
