Şokolad sevənlər üçün həm asan, həm də dadlı resept təqdim olunur. Bu tort üçün ayrıca xəmir yoğurmağa ehtiyac yoxdur, lakin nəticədə süfrənizə yaraşan möhtəşəm bir şirniyyat əldə edəcəksiniz. Foodinfo.az 1001sovet saytına istinadla xəbər verir ki, bu desertin əsasını kəsmik və şokoladlı qırıntı təşkil edir və onların uyğunluğu torta xüsusi zəriflik bəxş edir.

Resepti məşhur kulinariya bloqeri Alina FooDee bölüşüb. Hazırlanma prosesi olduqca sadədir və ev şəraitində rahatlıqla tətbiq oluna bilər. Ərzaqların düzgün nisbətdə seçilməsi və mərhələlərin ardıcıllıqla icrası tortun ideal alınmasını təmin edir.

Lazım olan ərzaqlar:
Un – 280 qram
Kərə yağı – 180 qram
Kakao – 60 qram
Şəkər tozu – 80-100 qram
Duz – bir çimdik

İçi üçün:
Kəsmik – 350 qram
Şəkər tozu – 70-100 qram
Vanilli şəkər – 20 qram
Yumurta – 3 ədəd
Xama – 70 qram
Qarğıdalı nişastası – 20-40 qram

Hazırlanması üçün əvvəlcə içlik üçün nəzərdə tutulan bütün ərzaqlar blender vasitəsilə hamar kütlə alınana qədər qarışdırılır. Ayrı qabda ələnmiş un, kakao, şəkər tozu və duz qarışdırılır, soyudulmuş kərə yağı sürtgəcdən keçirilərək ovulub xırda qırıntı halına gətirilir. Diametri 22 sm olan qəlibə qırıntının üçdə iki hissəsi tökülərək alt və kənarlar formalaşdırılır. Üzərinə kəsmikli qarışıq əlavə edilir və qalan qırıntı səpilir. 180 dərəcədə 40 dəqiqə bişirilir.

Tort otaq temperaturunda tam soyuduqdan sonra üzəri örtülərək soyuducuda 1-2 saat saxlanılır. Nəticədə həm görünüşü, həm də dadı ilə seçilən zərif şokoladlı şah tortu süfrənizi bəzəyəcək.