Biologiya elmləri doktoru Asiyat Abdullayeva bildirib ki, şorba soyuducuda üç-beş gün ərzində təhlükəsiz şəkildə saxlanıla bilər. Foodinfo.az xəbər verir ki, mütəxəssis şorbanın bişdikdən sonra otaq temperaturunda iki saatdan artıq saxlanmamasını tövsiyə edib.

Onun sözlərinə görə, bu müddətdən sonra yeməyi mütləq soyuducuya qoymaq lazımdır və temperatur dörd dərəcədən yuxarı olmamalıdır. Abdullayeva əlavə edib ki, saxlanma qaydalarına düzgün əməl olunmadıqda bakteriyalar sürətlə çoxala bilər.

Ekspert vurğulayıb ki, yeməklərin hermetik qabda saxlanması xüsusi əhəmiyyət daşıyır. Qapağı möhkəm bağlanan qab həm yad qoxuların hopmasının, həm də mikroorqanizmlərin çoxalmasının qarşısını alır.

O bildirib ki, şorbanı qaynatmaq onun saxlanma müddətini bir-iki gün uzada bilər. Bu isə xüsusən payız-qış mövsümündə yeməklərin israf edilməməsi üçün faydalı üsuldur.

Mütəxəssis həmçinin alıcılara tövsiyə edib ki, iri porsiyalar bişirərkən onların bir hissəsini donduraraq daha uzunmüddətli saxlama variantını da nəzərdən keçirsinlər.