Bir çox insan ac qaldıqda daha əsəbi, səbirsiz və gərgin olduğunu hiss edir. Hətta bu vəziyyət üçün ingilis dilində “hangry” – yəni “hungry” (ac) və “angry” (əsəbi) sözlərinin birləşməsindən yaranan xüsusi termin də mövcuddur. Alimlər bu halın təsadüfi olmadığını bildirirlər.

Foodinfo.az xarici mənbələrə istinadla xəbər verir ki, ABŞ-ın Şimali Karolina Universitetinin tədqiqatçıları uzun müddət ac qalmağın insanın emosional vəziyyətinə birbaşa təsir göstərdiyini müəyyən ediblər. Mütəxəssislərin sözlərinə görə, qanda şəkərin səviyyəsi aşağı düşdükdə beyin enerji çatışmazlığı hiss etməyə başlayır.

Qidalanma üzrə ekspert doktor Lisa Yanq bildirir ki, beynin əsas enerji mənbəyi qlükozadır. Qlükoza səviyyəsi azaldıqda diqqət, səbir və emosional nəzarət zəifləyə bilər. Nəticədə insan daha aqressiv və əsəbi reaksiyalar göstərməyə meyllənir.

Araşdırmalar göstərir ki, ac qalmaq stres hormonlarının, xüsusilə kortizolun və adrenalinin səviyyəsini də artıra bilər. Bu hormonlar orqanizmi enerji çatışmazlığına qarşı hazırlayır, lakin eyni zamanda gərginlik hissini gücləndirir.

Mütəxəssislər bildirirlər ki, zülal və liflə zəngin qidalar qəbul etmək qanda şəkərin daha stabil qalmasına kömək edir. Bu səbəbdən səhər yeməyini buraxmamaq və uzun fasilələrlə ac qalmamaq tövsiyə olunur.

Ekspertlərin fikrincə, ac olanda əsəbiləşmək xarakter problemi deyil, orqanizmin təbii fizioloji reaksiyasıdır. Düzgün qidalanma rejimi bu vəziyyətin qarşısını almağa kömək edə bilər.