Orqanizmi gümrah saxlamaq üçün qəhvədən istifadə etmək zəruri deyil. Foodinfo.az “Piroqov adına Universitet”in Klinik Tibb İnstitutunun dosenti Dmitri Karpenkoya istinadla xəbər verir ki, enerjini artırmaq üçün daha sağlam və təhlükəsiz alternativlər mövcuddur.
Mütəxəssisin sözlərinə görə, qəhvənin tərkibindəki maddələr qısa müddətli oyanıqlıq yaratsa da, uzunmüddətli istifadə zamanı bir sıra mənfi təsirlər göstərə bilər. O bildirib ki, qəhvə çox zaman mədə turşuluğunu artırır, qastrit və reflüks kimi xəstəlikləri kəskinləşdirir, eləcə də bağırsaq fəaliyyətini poza bilər.
Karpenko vurğulayıb ki, qəhvənin stimullaşdırıcı təsiri bədəndə stress hormonlarının ifrazı ilə bağlıdır. Bu hormonların mütəmadi artımı isə vegetativ sinir sisteminin fəaliyyətində pozğunluqlar yaradır və yuxu rejimini pozur.
Həkimin fikrincə, qəhvəni dörd faydalı içki ilə əvəz etmək mümkündür: çikori, matça (yaşıl çay tozu), suda və ya bitki mənşəli süddə hazırlanmış kakao, həmçinin zəncəfil çayı. Bu içkilər həm orqanizmi oyadır, həm də mədəyə zərər vermir.
Karpenko əlavə edib ki, enerjini təbii şəkildə artırmaq üçün qida seçimləri də mühümdür. Onun sözlərinə görə, alma, badam, qoz və yulaf sıyığı kimi məhsullar bədəni gücləndirir, qan şəkərini sabit saxlayır və gün ərzində davamlı enerji təmin edir.
Mütəxəssis qeyd edib ki, günə yüngül, balanslı səhər yeməyi ilə başlamaq, bol su içmək və təbii qidalarla qidalanmaq qəhvənin yaratdığı asılılıqdan xilas olmağa kömək edir.
O, həmçinin insanlara qəhvəni birdən-birə tərgitməməyi, miqdarı tədricən azaltmağı və orqanizmin reaksiyasını izləməyi tövsiyə edib.
