Yaz fəslində bir çox insan gözlənilən enerji artımı əvəzinə halsızlıq, apatiya və tez yorulma hissi ilə qarşılaşır ki, bu da orqanizmin mövsümi dəyişikliklərə uyğunlaşması ilə əlaqələndirilir. Bu vəziyyətdən çıxmaq üçün isə radikal addımlara deyil, sadə və davamlı vərdişlərə üstünlük vermək daha effektiv hesab olunur. Foodinfo.az aif.ru portalına istinadla xəbər verir ki, terapevt Olqa Krasnova yaz aylarında enerjini bərpa etməyin əsas yollarını açıqlayıb.

Həkimin sözlərinə görə, ilk addım qidalanmanın “yenidən qurulmasıdır” və bu zaman rasion daha yüngül və faydalı məhsullarla zənginləşdirilməlidir. Gündəlik olaraq 400–500 qram təzə tərəvəz və meyvə qəbul etmək, qoz-fındıq, balıq və dəniz məhsullarını artırmaq tövsiyə olunur. Bununla yanaşı, heyvani yağların, ağır və şəkərli qidaların azaldılması, onların əvəzinə isə yüngül ət və süd məhsullarına üstünlük verilməsi orqanizmin daha tez bərpa olunmasına kömək edir.

İkinci vacib məqam fiziki aktivliyin düzgün seçilməsidir. Mütəxəssis qəfil intensiv məşqlər əvəzinə, gündəlik gəzintilərlə başlamağı tövsiyə edir və bildirir ki, ilkin mərhələdə 1–2 min addım belə kifayət edə bilər. Zamanla bu göstəricini artırmaq daha sağlam və təhlükəsiz yanaşma hesab olunur.

Üçüncü istiqamət isə yuxu rejiminin normallaşdırılmasıdır. Günlərin uzanması ilə bioloji ritmlərin pozulması tez-tez rast gəlinir və bu da ümumi yorğunluğu artırır. Bu səbəbdən gündə ən azı 7–8 saat yatmaq, eyni saatda yatıb oyanmaq və gecə saatlarında işıq mənbələrini minimuma endirmək vacib sayılır.

Mütəxəssis əlavə edir ki, əgər bu dəyişikliklərə baxmayaraq halsızlıq davam edərsə, gecikmədən həkimə müraciət etmək lazımdır. Vaxtında aparılan müayinə mümkün gizli problemlərin aşkarlanmasına və onların qarşısının alınmasına kömək edir.