Əti yumaq onun faydasını əhəmiyyətli dərəcədə azaltmır, lakin bəzi hallarda sağlamlıq baxımından təhlükəli ola bilər. Ətin üzərində ola biləcək bakteriyalar su ilə təmizlənmir, yalnız bişirmə zamanı yüksək istilikdə məhv olur. 

Foodinfo.az xəbər verir ki, əti kran suyunun altında yuduqda bakteriyalar əlinizə, mətbəx səthlərinə və digər əşyalara yayıla bilər ki, bu da çarpaz yoluxma riskini artırır.

Əgər əti çox suda, xüsusilə də isti suda və uzun müddət yusanız, tərkibindəki bəzi suda həll olan vitaminlər, xüsusilə B qrupu vitaminləri və mineralların bir hissəsi itə bilər. 

Bu halda əti yumaq qismən faydasını azalda bilər. Ancaq sadəcə üstündəki qan və ya kir hissəciklərini yüngülcə duru suda yuyub qurulamaq qida dəyərinə ciddi təsir göstərmir.

Əsas olan gigiyena qaydalarına riayət etmək, əti bişirməzdən əvvəl və sonra əlləri, bıçaq və istifadə olunan səthləri yaxşıca təmizləməkdir. Ətin düzgün temperaturda bişirilməsi bakteriyaların öldürülməsi üçün kifayətdir və onu yumağa ehtiyac qalmır.