Mikrodalğalı soba bu gün əksər mətbəxlərin ayrılmaz hissəsinə çevrilib. O, yeməklərin tez isidilməsi, hazırlanması və əridilməsi prosesini xeyli asanlaşdırır. Foodinfo.az BB.LV saytına istinadla xəbər verir ki, həkimlər bəzi məhsulların və qabların mikrodalğalı sobada istifadəsinin ciddi risklər yaratdığını bildirir.
Mütəxəssislərin sözlərinə görə, mikrodalğalı sobada hər məhsulu və hər qabı istifadə etmək olmaz. Metal qablar, birdəfəlik plastik stəkanlar, yoqurt qabları və folqa qəti qadağandır. Bu materiallar yanğına və partlayışa səbəb ola bilər. Patofizioloq Yelena Paretskaya “Doktor Piter”ə açıqlamasında təhlükəli məqamları xüsusi vurğulayıb.
Bəzi məhsullar mikrodalğalı sobada problemsiz istifadə oluna bilər. Məsələn, kök, kartof və çuğundur bu üsulla bişirilə və ya əridilə bilər. Lakin bütöv tərəvəzlər mütləq çəngəl və ya dişçöpü ilə deşilməlidir. Əks halda daxildə yaranan təzyiq partlayışa səbəb ola bilər. Kartof adətən 7–10 dəqiqəyə bişir, tam hazır olmazsa, çevrilərək əlavə vaxt verilməlidir.
Mikrodalğalı sobada yarımfabrikat məhsulların – pizza, naggets, burgerlərin hazırlanması da mümkündür. Popkorn bişirmək və ya köhnə çörəyi yumşaltmaq da bu üsulla edilir. Əsas şərt məhsulun xarab olmaması, kif və xoşagəlməz qoxu verməməsidir. Yumurtanı isə yalnız qabıqsız halda hazırlamaq olar, çünki qabıq daxilində yığılan buxar partlayış yarada bilər.
Həkimlər bəzi məhsulların mikrodalğalı sobada qızdırılmasını qəti qadağan edir. Qabığında olan yumurta ən təhlükəli məhsullardan biridir. Üzüm də bu siyahıya daxildir. Mikrodalğada üzüm alovlana, hətta plazma effekti yarada bilər. Bu isə cihazın sıradan çıxmasına və xəsarətə səbəb ola bilər. Acı bibər də təhlükəlidir. Qızdırıldıqda kapsaisin buxarlanır və gözlərdə yanma, dəridə isə ciddi qıcıqlanma yarada bilər.
Süd və turş süd məhsulları da mikrodalğalı soba üçün uyğun sayılmır. Kefir, qatıq, süd və ayran qızdırıldıqda faydalı bakteriyalar məhv olur və məhsul kəsilir. Onları istifadə etməzdən əvvəl sadəcə otaq temperaturunda saxlamaq kifayətdir. Uşaq qidalarının da mikrodalğada qızdırılması tövsiyə edilmir. Qida qeyri-bərabər isinərək uşağın ağız və boğazında yanığa səbəb ola bilər. Plastik butulkalar isə istilik zamanı zərərli maddələr buraxa bilər.
Balın mikrodalğalı sobada qızdırılması da düzgün deyil. Kristallaşma keyfiyyət göstəricisi sayılır. Qızdırıldıqda isə bal öz faydalı xüsusiyyətlərini itirir. Maye halına qaytarmaq üçün su hamamı daha təhlükəsiz üsuldur.
Qab seçimi də xüsusi əhəmiyyət daşıyır. Qızılı haşiyəli boşqablar, plastik qablar, qida plyonkası, karton yemək qabları, taxta, çini və büllur məmulatlar mikrodalğalı soba üçün risklidir. Metal qablar dalğaları əks etdirərək partlayış və yanğına yol aça bilər. Hətta sobaya boş qab qoymaq da təhlükəlidir və cihazın sıradan çıxmasına səbəb ola bilər.
Mütəxəssislər mikrodalğalı soba üçün ən uyğun variantın qalın divarlı, odadavamlı şüşə qablar olduğunu bildirir. Bu material dalğaları udmur və təhlükəsiz sayılır. Keramika qablar da uyğundur, lakin temperatur dəyişikliyinə həssasdır. Plastik qablar isə yalnız keyfiyyətli və yüksək temperatura davamlı olduqda istifadə edilməlidir.
Həkimlər diqqətli olmağı, məhsul və qab seçimində qaydalara əməl etməyi tövsiyə edir. Bu həm sağlamlığı qorumağa, həm də məişət texnikasının təhlükəsizliyini təmin etməyə kömək edir.
